ავსტრიაში ვაქცინაცია სავალდებულო ხდება

ავსტრიაში, თებერვლიდან 18 წელს ზემოთ პირებისთვის ვაქცინაცია სავალდებულო ხდება. ინფორმაციას ქვეყნის ჯანდაცვის სამინისტრო ავრცელებს.

„კორონავირუსის პანდემიასთან წარმატებული ბრძოლისა და ავსტრიის ჯანდაცვის სისტემის დაცვისთვის აუცილებელია ვაქცინაციით მოცვის მაღალი მაჩვენებელი. ამიტომ თებერვლის პირველი დღეებიდან ავსტრიაში COVID-19-ის საწინააღმდეგო  ვაქცინაცია სავალდებული გახდება“, - ნათქვამია უწყების განცხადებაში.

თებერვლის დასაწყისიდან 15 მარტამდე უპირველესად  აცრა უნდა გაიკეთონ არავაქცინირებულმა ადამიანებმა. ისინი შესაბამის შეტყობინებებს ფოსტით მიიღებენ.

15 მარტიდან სავალდებულო ვაქცინაციის პროცესი ხელისუფლების მხრიდან გაკონტროლდება. დარღვევისთვის დაწესებული იქნება ჯარიმა 600 ევროს ოდენობით, ზოგიერთ შემთხვევაში ჯარიმის მაქსიმალური ოდენობა, შესაძლოა, 3 600 ევრომდე გაიზარდოს.

ვაქცინაციის ვალდებულება არ ექნებათ 18 წლამდე მოზარდებს, ორსულებს, პირებს, რომლებისთვისაც ვაქცინაცია, შესაძლოა, ჯანმრთელობის რისკებთან იყოს დაკავშირებული. ასევე გამონაკლისი დაიშვება კოვიდგადატანილებისთვისაც კორონავირუსზე დადებითი პასუხიდან 180 დღის განმავლობაში.