ეუთო-ს რეზოლუციის მიღების შემდეგ სხვადასხვა ქვეყნის წარმომადგენლები ბოდიშებს უხდიდნენ საქართველოს დელეგაციას, რა ვქნათ, პოლიტიკაა და ამიტომ მივიღეთ გადაწყვეტილებაო - არჩილ გორდულაძე

სხვადასხვა ქვეყნის წარმომადგენლები ბოდიშებს უხდიდნენ საქართველოს დელეგაციას, რა ვქნათ, პოლიტიკაა და ამიტომ მივიღეთ გადაწყვეტილებაო, - ამის შესახებ პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ ეუთო-ს მიერ რეზოლუციის მიღებასთან დაკავსირებით საქართველოს პირველი არხის გადაცემაში „დღის თემა“ განაცხადა.

გადაცემის წამყვანის შეკითხვაზე, რატომ არ გაითვალისწინეს ასამბლეის წევრებმა ქართული დელეგაციის მცდელობა, საერთოდ უარი ეთქვათ ამ რეზოლუციის მიღებაზე, გორდულაძემ უპასუხა, რომ ეს ძალიან მარტივია.

„შემდეგ რატომაც მიდიოდნენ ბატონ მახაშვილთან, სამხარაძესთან, ბითაძესთან და ბოდიშებს უხდიდნენ სხვადასხვა ქვეყნის დელეგაციის წარმომადგენლები, რა ვქნათ, პოლიტიკაა და ამიტომ მივიღეთ ეს გადაწყვეტილებაო. ისინი თავისუფალი არ არიან თავიანთ გადაწყვეტილებაში, ხმას როდესაც და რასაც აძლევენ, რეალურად, ეს მათი გადაწყვეტილება არ არის. ასეთია პოლიტიკური მდგომარეობა და პოლიტიკური მიმართება საქართველოს მიმართ. მაგალითისთვის, ეუთო-ს რეზოლუცია პირდაპირ ეწინააღმდეგება ეუთო/ოდირ-ის სტანდარტებსვე“, - განაცხადა გორდულაძემ.

წამყვანის შეკითხვაზე, იგეგმება თუ არა, ეუთო-ს საპარლამენტო ასამბლეაც დატოვოს ქართულმა დელეგაციამ, არჩილ გორდულაძემ განაცხადა, რომ ამ საკითხთან დაკავშირებით არცერთ მსჯელობას არ დასწრებია.

მისივე თქმით, საქართველოს კონსტიტუციაში წერია, რომ ერთადერთი წყარო არსებობს ამ ქვეყანაში ხელისუფლების და ეს არის ქართველი ხალხი, მათი არჩევანი, ქართველმა ხალხმა კი თავისი არჩევანი გააკეთა.

„ჩვენ აღებული ვალდებულებები რაც გვაქვს ასოცირების ხელშეკრულებით, პირნათლად ვასრულებთ, გეგმაზომიერად, ეტაპობრივად, აღმასრულებელი და საკანონმდებლო ორგანოს ჩართულობით, სასამართლო სისტემის ჩართულობით, პროკურატურის ჩართულობით და შემდეგ ეს ანგარიშები ქვეყნდება და იგზავნება კიდეც ევროკავშირში. ჩვენ ჩვენს წილ ვალდებულებას, რაც გვაქვს, პირნათლად და სრულად ვასრულებთ, მაგრამ ვინმე თუ თითს გვიქნევს და გვემუქრება საქართველოს მოქალაქეებს, მაგალითად, გადაირჩიეთ ან არ აირჩიოთ ეს ხელისუფლება, რადგან ევროკავშირში არ მოგიყვანთო, ეს სიტყვები აქვს ნათქვამი ევროკავშირის წარმომადგენელს ამ ქვეყანაში, ამ ყველაფერზე ქართული საზოგადოებაც და ჩვენი გუნდიც ერთხმად ვეუბნებით – ასეთი რამ გამორიცხულია“, - განაცხადა გორდულაძემ.

შეგახსენებთ, ეუთო-ს საპარლამენტო ასამბლეამ გუშინ მიიღო ამერიკელი კონგრესმენის ჯო უილსონის მიერ საქართველოს შესახებ მომზადებული კრიტიკული რეზოლუცია, რომელიც მოუწოდებს ხელისუფლებას, გაათავისუფლოს პოლიტიკური პატიმრები და გააუქმოს ფუნდამენტური თავისუფლებების შემზღუდავი კანონმდებლობა.