Pfizer-მა და BioNTech-მა ევროპის სამედიცინო სააგენტოს მიმართეს ვაქცინის დამტკიცების თხოვნით

საქართველო, თბილისი - 22:40 | 01.12.2020
ნანახია: 2628

ამერიკულმა ფარმაცევტულმა კომპანიამ Pfizer-მა და გერმანულმა ფარმაცევტულმა კორპორაცია BioNTech-მა მათ მიერ შემუშავებული ვაქცინის დამტკიცების თხოვნით ევროპის სამედიცინო სააგენტოს (EMA) მიმართეს.

კომპანიების მიერ გავრცელებული განცხადების მიხედვით, ვაქცინა, პირობით სახელით BNT162b2, დამტკიცების შემთხვევაში მიმდინარე წლის ბოლომდე უკვე ხელმისაწვდომი იქნება ევროპაში.

მანამდე ამ კომპანიებმა ვაქცინის დამტკიცების მოთხოვნა წარადგინეს აშშ-ის საკვების და მედიკამენტების ადმინისტრაციაში (FDA). ფედერალური უწყების დამოუკიდებელი ექსპერტები კლინიკური კვლევების შედეგების განსახილველად 10 დეკემბერს შეიკრიბებიან.

დადებითი პასუხის შემთხვევაში, ადმინისტრაცია და ინფრასტრუქტურა უკვე მომზადებულია იმისთვის, რომ ვაქცინის დამტკიცება და შემდეგ მისი დისტრიბუცია რამდენიმე დღის განმავლობაში მოხდეს. ვარაუდობენ, რომ ამერიკაში ვაქცინა უკვე 25 დეკემბრამდე იქნება ხელმისაწვდომი.

18 ნოემბერს Pfizer-მა და BioNTech-მა განაცხადეს, რომ მათ მიერ შემუშავებულმა ვაქცინამ 95%-იანი ეფექტურობა აჩვენა. გავრცელებული ინფორმაციით, 65 წელზე მეტი ასაკის მქონე ადამიანებში ვაქცინის ეფექტურობამ 94%-იან ნიშნულს გადააჭარბა.

ორი დღით ადრე (16 ნოემბერს), გავრცელდა ინფორმაცია, რომ ამერიკული ფარმაცევტული კორპორაცია Moderna-ს ვაქცინამ 94.5%-იანი ეფექტურობა აჩვენა.

Pfizer-ისა და BioNTech-ის მსგავსად, Moderna-მაც წარადგინა ვაქცინის დამტკიცების მოთხოვნა აშშ-ის საკვების და მედიკამენტების ადმინისტრაციასა და ევროპის სამედიცინო სააგენტოში.




არქივი

მოგვძებნე Facebook-ზე