არნოლდ შვარცნეგერი მიუნხენის აეროპორტში საბაჟო წესების დარღვევისთვის შეაყოვნეს

საქართველო, თბილისი - 10:56 | 18.01.2024
ნანახია: 2958

ჰოლივუდის ცნობილი მსახიობი და კალიფორნიის შტატის ყოფილი გუბერნატორი არნოლდ შვარცნეგერი მიუნხენის აეროპორტში შესამოწმებლად დააკავეს.

"დოიჩე ველეს" ინფორმაციით, შვარცნეგერი მიუნხენის აეროპორტში შემოწმების მიზნით გააჩერეს. ამის შესახებ DW-თან საუბარში საბაჟოს წარმომადგენელმა თომას მაისტერმა დაადასტურა. მისი თქმით, ეს იყო რუტინული შემოწმება. შედეგად, აღმოჩნდა, რომ არნოლდ შვარცენეგერმა საბაჟო წესები დაარღვია.

სააგენტო dpa-ს ცნობით, არნოლდ შვარცნეგერმა, რომელიც ლოს ანჯელესიდან მიუნხენში ჩაფრინდა, არ მოახდინა ძვირადღირებული საათის დეკლარირება. ამ შემთხვევაში, მათი დაბეგვრის გარეშე გადატანის მცდელობა დარღვევად მიიჩნევა. "თუ პროდუქცია ევროკავშირში რჩება, აუცილებელია გადასახადებისა და ბეგარის გადახდა. ეს ეხება ყველას," - განუცხადეს მედიას საბაჟო სამსახურის თანამშრომლებმა.

გამოცემა Bild-ის თანახმად, ქრონოგრაფი უნიკალურია, ის საათების შვეიცარიულმა მწარმოებემლმა Audemars Piguet-მა ერთადერთ ეგზემპლარად გამოუშვა სპეციალურად „რკინის არნისთვის“. მისი ფასი უცნობია - თავად შვარცნეგერი, სავარაუდოდ, 20 ათასს ევროს ასახელებს. ამ კომპანიის ინდივიდუალური მოდელების ფასები ასობით ათასი ევროს აღწევს.

არნოლდ შვარცნეგერმა საათი ევროპაში ჩამოიტანა, რათა ავსტრიაში, კიცბიულეში საქველმოქმედო აუქციონზე გამოეფინა. ეს არის სათხილამურო კურორტი, რომელიც ცნობილია მთელს ევროპაში. მიღებული შემოსავალი კლიმატის დაცვას უნდა მოხმარებოდა, რომელსაც შვარცნეგერი განსაკუთრებულ ყურადღებას აქცევს.

მედიის ცნობით, საბაჟოზე არ აქვთ ინფორმაცია, წავიდა თუ არა შვარცნეგერი პირდაპირ ავსტრიაში. უწყების წარმომადგენლებმა DW–სთან ინტერვიუში უარი თქვეს დამატებითი დეტალების შესახებ შესაძლო ჯარიმასთან დაკავშირებით, რომელიც ცნობილ მსახიობს ემუქრება.

როგორც გამოცემა აღნიშნავს, შემოწმებით და დაყოვნებით შვარცნეგერი აღფრთოვანებული არ დარჩენილა.


პოლიტიკა



არქივი

მოგვძებნე Facebook-ზე