მძაფრდება ეჭვები, რომ კონკრეტული ალიანსია ჩამოყალიბებული ორ პოლიტიკოსს შორის - ირაკლი კობახიძე გახარიასა და სააკაშვილზე

ყოველდღე მძაფრდება ეჭვები იმასთან დაკავშირებით, რომ ორ პოლიტიკოსს შორის კონკრეტული ალიანსია ჩამოყალიბებული, - აცხადებს პარტია ქართული ოცნების თავმჯდომარე ირაკლი კობახიძე. მისი განმარტებით, მორწმუნეებს შეიძლება, სჯეროდეთ, რომ ის ორი-სამი დღეც იყო დამთხვევა და მათი სასტუმროში ერთად ყოფნა დამთხვევა.

"მაგრამ ჩვენ შეიძლება, გვეჯეროდეს სხვა რამის. ყოველდღე მძაფრდება ეჭვები იმასთან დაკავშირებით, რომ კონკრეტული ალიანსია ჩამოყალიბებული ორ პოლიტიკოსს შორის და ეს მეტად გაამძაფრა ამ ე.წ. დამთხვევამ“, – განაცხადა ირაკლი კობახიძემ.

მისივე თქმით, სააკაშვილთან თანამშრომლობის მოტივზე გარკვეული ინფორმაცია აქვთ, თუმცა ამაზე დეტალურად მას შემდეგ ისაუბრებს, რაც ინფორმაციას დააზუსტებენ.

„შეიძლება, მოტივი იყოს სხვადასხვა და ამასთან დაკავშირებით გარკვეული ინფორმაციაც გვაქვს, მაგრამ არ გვინდა, ჭორაობაში შევიდეთ. შეიძლება, მაგალითად, იყოს ამ თანამშრომლობის მერკანტილური მოტივები და მიზეზები, შეიძლება, იყოს სხვა მიზეზებიც, მაგრამ მარტივად რომ გავაანალიზოთ – არის თვითმმართველობის არჩევნები. ყველამ ვიცით, რომ ორნიშნა შედეგს და მიახლოებულს გახარია ვერ აიღებს. შემოდის იმისთვის, რომ რამდენიმე საკრებულოში ორი-სამი კაცი გაიყვანოს? ხომ ძალიან ნათელია, რომ პირდაპირ შემოდის იგივე მიზნით, რაც აქვს „ნაციონალურ მოძრაობას“, რომ „ქართული ოცნება“ რამენაირად დაახლოვოს 43 პროცენტს. ძალიან მარტივად იკვეთება ინტერესები და ამ ინტერესების უკან რა შეიძლება იდგეს, შეიძლება გვქონდეს ჩვენი ინფორმაცია. როცა დავაზუსტებთ ამ ინფორმაციას, შემდეგ დეტალურად ვისაუბრებთ“, – აღნიშნა ირაკლი კობახიძემ.