ღარიბაშვილმა მადლობა უნდა გადამიხადოს, რომ ის არის დღეს პრემიერ მინისტრი - მელია

საქართველო, თბილისი - 19:23 | 24.05.2021
ნანახია: 748

ღარიბაშვილის ადგილზე, მადლობას გადავუხდიდი ,,ნაციონალური მოძრაობის" თავმჯდომარეს, რომ არა მე, დღეს პრემიერ მინისტრი იქნებოდა ბატონი გახარია და ბატონი ღარიბაშვილი იქნებოდა ისევ იქ, სადაც იყო, - ასე უპასუხა ენმ-ს თავმჯდომარემ ნიკა მელიამ პრემიერ მინისტრის განცხადებას, რომ ოპოზიციური პარტია რთულ მდგომარეობაშია და პარლამენტში შესვლაც და შეუსვლელობაც აზიანებს მას.

ბატონი ღარიბაშვილი 24 საათი რომ ,,ნაციონალურ მოძრაობაზე" და ჩემზე საუბრობს, აქაც ხომ ჩანს, რომ მშვიდი ძილის შესაძლებლობა მას არ აქვს. მეორე - ბატონი ღარიბაშვილის ადგილზე, მე, მადლობას გადავუხდიდი ,,ნაციონალური მოძრაობის" თავმჯდომარეს, რომ არა მე და რომ არა ის უსამართლობისადმი თავის არდახრა, დღეს პრემიერ მინისტრი იქნებოდა ბატონი გახარია და ბატონი ღარიბაშვილი იქნებოდა ისევ იქ, სადაც იყო. ბატონ ღარიბაშვილს მართებს, რომ მადლობა გადამიხადოს, რომ ის არის დღეს პრემიერ მინისტრი.

რაც შეეხება მის სხვა პოლიტიკურ განცხადებებს - არ აღვიქვამ ამ განცხადებებს იმდაგვარად, რომ ეს განცხადებები კეთდება პოლიტიკოსის მიერ, არა თუ პრემიერის მიერ. ჩვენ ხომ ვნახეთ, ადამიანი როცა იყო დასაქმებული პრემიერმინისტრად, როგორც კი მოინდომა მისმა დამსაქმებელმა, იმწამსვე ის გადადგა, მერე მე შევუწყვე ხელი, რომ მოსულიყო პრემიერმინისტრად და მევე შევუწყობ ხელს მეგობრებთან ერთად, რომ ის აღარ იყოს თუნდაც ნომინალურად პრემიერმინისტრი ძალიან მალე", - თქვა მელიამ


პოლიტიკა