ციხეზე არ გადის პოლიტიკური კარიერა, არავინ აღმოჩნდა, ვინც მელიას სწორ რჩევას მისცემდა - წულუკიანი

ვფიქრობ, რომ პოლიტიკურად, თუკი ავიღებთ ერთ პოლიტიკოსს, ნიკანორ მელიას, მისთვის ციხე არავითარ პოლიტიკურ ბენეფიტს არ მოიტანს, - განაცხადა ქართული ოცნების დეპუტატმა, თეა წულუკიანმა ნიკა მელიას საქმეზე. ნაციონალური მოძრაობის თავმჯდომარის დაკავებაზე საუბრისას წულუკიანმა აღნიშნა, რომ ეს იყო "ერთადერთი სწორი სამართლებრივი გზა" და რომ პოლიციამ "შესანიშნავი პროფესიონალიზმით" ჩაატარა ეს ოპერაცია.

"პოლიციამ შესანიშნავი პროფესიონალიზმით, მშვიდობიანად ჩაატარა დაკავების ღონისძიება.

მე ვფიქრობ, რომ პოლიტიკურად, თუკი ავიღებთ ერთ პოლიტიკოსს, ნიკანორ მელიას, მისთვის ციხე არავითარ პოლიტიკურ ბენეფიტს არ მოიტანს. მე, როდესაც მინისტრად დავინიშნე, ის მუშაობდა, როგორც ადეიშვილის კადრი იუსტიციის სამინისტროში და მეტნაკლებად გვქონდა გაცნობის საშუალება. მან, ალბათ იცის, რომ მე ტყუილთან არ ვმეგობრობ და გულწრფელად ვიტყვი, რომ ციხეზე არ გადის პოლიტიკური კარიერა. ასევე, არ აღმოაჩნდა არავინ ვინც სწორ რჩევას მისცემდა. რეალურად მის პოლიტიკურ გარემოცვას აწყობს ნიკა მელია ციხეში", - თქვა თეა წულუკიანმა.