გიგა ბოკერია ამბობს, რომ ინფორმაციას არ ფლობს რომელიმე მნიშვნელოვანი ფიგურის მიერ პარტიის დატოვების შესახებ

"ევროპული საქართველოს" ერთერთი ლიდერი გიგა ბოკერია ამბობს, რომ მისთვის უცნობია ინფორმაცია იმის შესახებ, რომ პარტიას რომელიმე მნიშვნელოვანი ფიგურა ტოვებდეს. თუმცა განაცხადა,, რომ სტრუქტურულ ცვლილებებზე მსჯელობა "ევროპულ საქართველოში" ნამდვილად მიმდინარეობს.

"არანაირი ინფორმაცია იმაზე, რომ პარტიას ვინმე, მნიშვნელოვანი ფიგურა ტოვებს, მე არ გამაჩნია. აქ არის მსჯელობა სტრატეგიაზე, რომლის ნაწილიც არის სტრუქტურული ცვლილებები და ასევე, სტრატეგიის ნაწილია, მათ შორის, პერსონალური გადაწყვეტილებებიც, ოღონდ არცერთი ასეთი გადაწყვეტილება, ამ ეტაპზე, მიღებული არ არის"- განაცხადა ბოკერიამ.

ამასთან, მან აღნიშნა, რომ პარტიაში მიმდინარე დისკუსია "არანაირად არ ეხება 2020 წლის არჩევნების შედეგების ლეგიტიმურად არცნობას".

პარტიის თავმჯდომარის თანამდებობიდან დავით ბაქრაძის შესაძლო წასვლის შესახებ ინფორმაცია, ბოლო ორი დღეა, ვრცელდება.