გია ხუხაშვილი ამბობს, რომ შესაძლოა პოლიტიკაში ერთჯერადად დაბრუნდეს

გია ხუხაშვილი ამბობს, რომ შესაძლოა პოლიტიკაში ერთჯერადად დაბრუნდეს, ამის მიზანი კი ქვეყანაში კონსტიტუციური წესრიგის აღდგენა იქნება.

გია ხუხაშვილი ამბობს, რომ ახლა, როცა "ოცნების" თავმჯდომარე ხდება ირაკლი კობახიძე, დაუშვებელია განზე გადგომა.

"მე თუ პოლიტიკურ პროექტში მივიღებ მონაწილეობას, ეს ისევ ერთჯერადი მონაწილეობა იქნება, არ არის პოლიტიკა ახლა ჩემი საქმე იმდენად, რომ გრძელვადიან პროექტზე ვიფიქრო და არც იმ ასაკში ვარ, მაგრამ როგორც ერჯერად პროექტში, მონაწილეობას ვაპირებ, რომ ქვეყანაში კონსტიტუციური წესრიგი აღსდგეს, იმიტომ რომ ამ მიმართულებით კობახიძე შეუქმნის საფრთხეს ყველაფერს. რა ფორმით მოხდება ეს, ვინმესთან თანამშრომლობით, ახალი პლატფორმა შეიქმნება თუ როგორ, ამას მომავალი გვიჩვენებს, - ამბობს გია ხუხაშვილი.

მანამდე ხუხაშვილმა Facebook-ზე დაწერა, რომ მას ივანიშვილის მიმართ პიროვნული ვალდებულება ჰქონდა, რომ მის წინააღმდეგ პოლიტიკურ პროცესში მონაწილეობა არ მიეღო, თუმცა მისი თქმით, მმართველი პარტიის თავჯდომარედ კობახიძის დანიშვნა "აბსურდი და მაღალი სახელმწიფოებრივი რისკების ფაქტორია":

"მიუხედავად მწვავე კრიტიკისა, მქონდა პიროვნული ვალდებულება, არ მიმეღო მონაწილეობა მის წინააღმდეგ პოლიტიკურ პროექტში. კობახიძე, როგორც მმართველი პარტიის თავმჯდომარე არის აბსურდი და მაღალი სახელმწიფოებრივი რისკების სერიოზული ფაქტორი.

შესაბამისად, ერთის მხრივ პირადი ვალდებულება ძალას კარგავს და მეორეს მხრივ ჩნდება ამ ტრაგი-კომიკური სცენარის აღკვეთის საზოგადოებრივი ვალდებულება. ეს მოცემულობა განაპირობებს ჩემს შემდგომ ნაბიჯებს",-წერს ხუხაშვილი.