ერთადერთი გამოსავალია ახალ არჩევნებთან დაკავშირებით შეთანხმება - ბადრი ჯაფარიძე

ჩვენი ღრმა რწმენით, ერთადერთი გამოსავალია ახალ არჩევნებთან დაკავშირებით შეთანხმება. განაცხადა ლელოს ლიდერმა ბადრი ჯაფარიძემ ევროკავშირისა და აშშ-ის ელჩებთან შეხვედრის შემდეგ ჟურნალისტებთან საუბრისას.

ბადრი ჯაფარიძის თქმით, ელჩებს აწუხებთ პოლიტიკური კრიზისი, რომელიც შექმნილია ქვეყანაში და "ჩვენთან ერთად მსჯელობენ ამ კრიზისიდან გამოსავალზე".

"ჩვენ ყველამ ერთად უნდა ვიმუშაოთ, მათ შორის „ქართულმა ოცნებამ“, რათა გამოვიდეთ ამ კრიზისიდან. ამ შემთხვევაში გაუცხოება და ერთმანეთთან დაპირისპირება რა არის გამოსავალი. შეთანხმება არ იქნება ერთ-ერთი მხარის დამარცხება, შეთანხმება იქნება ჩვენი ხალხის ინტერესებიდან გამომდინარე, ჩვენი ქვეყნის გამარჯვება.

ჩვენი პოზიცია არ დაგვიმალავს, ოპოზიცია მიიჩნევს, რომ არჩევნები გაყალბდა. ჩვენი ღრმა რწმენით, ერთადერთი გამოსავალია ახალ არჩევნებთან დაკავშირებით შეთანხმება. ჩვენი პოზიცია ამაზე არ შეცვლილა. იმედია, „ქართულ ოცნებას“ ესმის, რომ დაპირისპირება და ოპოზიციის უგულებელყოფა მხოლოდ აღრმავებს კრიზისს. ამიტომ ერთად უნდა ვიმუშაოთ.

ამ შეხვედრაზე განვიხილავდით შექმნილ ვითარებას და ვმსჯელობდით კრიზისის განმუხტვის და გამოსავლის შესაძლებლობებზე, სხვა დეტალებს ვერ მოგახსენებთ. იმედი გვაქვს, „ქართული ოცნებაც“ პასუხისმგებლიანად მიუდგება იმ რთულ ვითარებას, რომელშიც ვიმყოფებით", - განაცხადა ბადრი ჯაფარიძემ.

შეგახსენებთ, ოპოზიციის წარმომადგენლები ევროკავშირისა და ამერიკის შეერთებული შტატების ელჩებთან ინდივიდუალურ შეხვედრებს მართავენ.