ბიუჯეტის შექმნაში ბიძინა ივანიშვილი მონაწილეობდა - გიორგი გახარია

პრემიერ მინისტრმა გიორგი გხარიამ მთავრობის რიგგარეშე სხდომაზე 2020 წლის სახელმწიფო ბიუჯეტის წარდგენისას განაცხადა, რომ ბიუჯეტის შექმნაში ბიძინა ივანიშვილიც მონაწილეობდა.

„კოლეგებო, თქვენ ყველას მოგეხსენებათ, რომ ეს იყო პირველი ბიუჯეტი, რომელზეც ჩვენ, მთელი პოლიტიკური გუნდი ერთად ვმუშაობდით. ამ ბიუჯეტის შექმნაში მონაწილეობდა პარტიის თავმჯდომარე |ბიძინა ივანიშვილი|, ასევე მთავრობის თითოეული წევრი, თითოეული დეპუტატი, ასევე, ადგილობრივი ხელისუფლებების წარმომადგენლებიც”, - განაცხადა პრემიერ მინისტრმა.

მისი თქმით, 2020 წლის ბიუჯეტში განსაკუთრებული ყურადღება დაეთმობათ ბავშვებს, პენსიონერებს, ღვაწლმოსილ მოხუცებს, მასწავლებლებს, ექიმებს, სამართალდამცველებსა და ჯარისკაცებს.

"2020 წლის ბიუჯეტში გათვალისწინებულია ყველა პენსიონერისთვის, ასევე 18 წლამდე ასაკის და პირველი და მეორე ჯგუფის შეზღუდული შესაძლებლობების პირებისთვის 20 ლარით პენსიის ზრდა. ასევე, პირველი ივლისიდან 70 წელს გადაცილებული პენსიონერებისთვის დამატებით 30 ლარით პენსიის ზრდა, რაც იმას ნიშნავს, რომ მომავალი წლის ბიუჯეტში ამ ჯგუფის მოქალაქეებს პენსია გაეზრდებათ 50 ლარით“ - თქვა გახარიამ.