ივანიშვილს მოსთხოვეთ პასუხი, რატომ დაამცირებინეთ საკუთარი თავები - ნიკა მელია „ქართული ოცნების“ დეპუტატებს

არ არსებობდა არც ერთი მტკიცებულება იმისთვის, რომ პატიმრობაში წავსულიყავი, - ამის შესახებ ნიკა მელიამ საქალაქო სასამართლოსთან ჟურნალისტებს განუცხადა, სადაც აღკვეთის ღონისძიების სახით მას 30 000-ლარიანი გირაო შეეფარდა.

„გუშინ, როდესაც ეს პროკურორი, ამირან გულუაშვილი და პროკურატურის წარმომადგენლები ზუსტად ანალოგიური სიტყვით მიმართავდნენ დეპუტატებს კომიტეტის სხდომებზე, შემდეგ პარლამენტის სხდომათა დარბაზში, ალაპარაკეს 92 დეპუტატი „ქართული ოცნების“ რიგებიდან, რომ საკმარისია მტკიცებულებები, დამნაშავე არის მელიაო, ამიტომ უნდა მივაჭიროთ მწვანე ღილაკს თითი მის დასაპატიმრებლადო, რა შეიცვალა ამის შემდეგ? შიშმა აიყოლია ბიძინა ივანიშვილი, რადგან ძალიან არასწორ პოზიციაზე იდგა. არ არსებობდა არც ერთი მტკიცებულება იმისთვის, რომ პატიმრობაში წავსულიყავი”- განაცხდა მელიამ.

მისი თქმით, გაათმაგებული ენერგიით გააგრძელებს ბრძოლას.

„92 დეპუტატს მივმართავ, მერიდება თქვენ ნაცვლად, რა გიქნათ, აბრძანდით ბიძინა ივანიშვილთან და მოსთხოვეთ პასუხი, რატომ დაამცირებინეთ საკუთარი თავები ასე. ჩემს კოლეგებს მივმართავ, წესით და რიგით ის ხალხი უნდა იყოთ, რომლებმაც ამ ქვეყანას წარმატება უნდა მოუტანონ. გაასმაგებული, გახუთმაგებული, გაათმაგებული ენერგიით ვაპირებ ბრძოლას ამ არანორმალურ მოვლენასთან, - აღნიშნა მან.

როგორც ნიკა მელიამ აღნიშნა,  პარლამენტის სხდომებს დაესწრება და კოლეგბს „ქართული ოცნებიდან“ დაუსვამს შეკითხვას როგორ მოხდა, რომ პარლამენტის შენობის შტურმით ამღები კვლავ მათ გვედრით დაჯდა.

 „პარლამენტში სხდომებს დავესწრები, „ქართული ოცნებიდან“ ჩემს კოლეგებს დავუსვამ კითხვებს – რა მოხდა ხალხო, თქვენ წინაშეა კრიმინალი, დამნაშავე, შენობის შტურმით ამღები და მე კვლავ თქვენ გვერდით ვზივარ? ან ისინი არ უნდა დასხდნენ ჩემ გვერდით დარბაზში ან მე არ უნდა დავჯდე. მე რა თქმა უნდა, ვიქნები იქ, სადაც უნდა ვიყო“, – განაცხადა ნიკა მელიამ.