აჭარის სოფლად განვითარების 2016-2021 წლების სტრატეგია უკვე მზადაა

საქართველო, თბილისი - 14:36 | 25.09.2015

ნანახია: 2335

აჭარის სოფლად განვითარების 2016-2021 წლების სტრატეგია უკვე მზადაა. სტრატეგიაზე ”პოლიტიკის და მართვის კონსალტინგ ჯგუფი - PMCG”-ის ექსპერტებმა იმუშავეს.

როგორც სტრატეგიის პრეზენტაციაზე გაირკვა, 2016-2021 წლების სტრატეგიის პირველ ნაწილში გაანალიზებულია აჭარის სოფლად განვითარების არსებული მდგომარეობა და მოცემულია ინდიკატორები. დოკუმენტი მოიცავს სტრატეგიის განსახორციელებლად საჭირო კოორდინაციის, შეფასებისა და მონიტორინგის მექანიზმებს; აგრეთვე, ინსტიტუციებს, რომელთა არსებობაც ხელს შეუწყობს სტრატეგიის განხორციელებას.

სტრატეგიის ცალკეული ნაწილების მოსამზადებლად გაიმართება შეხვედრები საზოგადოების სხვადასხვა ჯგუფებთან. სტრატეგიის შესამუშავებლად გამოყენებული იქნება არსებული კვლევები და დოკუმენტები. სტრატეგიის მომზადებული ნაწილები განხილული იქნება დაინტერესებულ მხარეებთან და სამუშაო ჯგუფების წარმომადგენლებთან. ხედვა და სტრატეგიული მიმართულებები შემუშავებული იქნება აჭარლების მოსაზრებებსა და შესაძლებლობების გათვალისწინებით. სამუშაო გეგმაში აჭარის არ-ის სტრუქტურების, მუნიციპალიტეტებისა და სახელმწიფო ორგანიზაცების პროექტების გარდა გათვალისწინებული იქნება დონორი ორგანიზაციების, ბიზნესისა და არაკომერციული ორგანიზაციების პროექტები.

სოფლად განვითარების ცნებამ გასული საუკუნის 60-იანი წლებიდან ტრანსფორმაცია განიცადა და დღეს აღიარებული განმარტება ევროკავშირის პროგრამის LEADER მიდგომას ემთხვევა. ამ უკანასკნელზეა აგებული აჭარის სოფლად განვითარების სტრატეგიაც, რომელიც განსხვავებულ მიდგომებს ითვალისწინებს ვიდრე ადგილობრივი და რეგიონური განვითარების სტრატეგიები.

როგორც PMCG-ში აცხადებენ, აჭარის მოსახლეობა მცირდება 1989 წლის შემდეგ. მოსახლეობის შემცირება გამოწვეულია, როგორც დემოგრაფიული ფაქტორებით, ისე მოსახლეობის ქვეყნის შიდა და გარე მიგრაციით. აჭარის 333 სოფელში ავტონომიური რესპუბლიკის 96.6% ტერიტორიაზე მოსახლეობის 44.5% ცხოვრობს. აჭარის მოსახლეობა სოფლად 1989 წლის აღწერასა და 2015 წლის 1-ელ იანვარს შორის 9.2%-ით არის შემცირებული. სოფლის ტერიტორიებზე მოსახლეობის სიმჭიდროვე ყველაზე მაღალი ხელვაჩაურის მუნიციპალიტეტშია - 145 კაცი 1კვ.კმ.-ზე, ხოლო დანარჩენ მუიციპალიტეტებში ეს მაჩვენებელი 65-ზე ნაკლებია.