ყველაფერს ვაკეთებთ, რომ გუნდის ყველა წევრი იქნას შენარჩუნებული - მამუკა მდინარაძე

საპარლამენტო უმრავლესობის ერთ-ერთი ლიდერი, მამუკა მდინარაძე აცხადებს, რომ მმართველი პარტია ყველაფერს გააკეთებს, რათა გუნდის ერთიანობა შენარჩუნებული იყოს, შესაბამისად პარტიიდან ვინმეს გარიცხვის საკითხი დღის წესრიგში არ დამდგარა.  

"არავის გარიცხვის საკითხი დღის წესრიგში არ დამდგარა, იყო გარკვეულ თემებზე საუბარი რისი პასუხიც იყო, "ჩვენ გადავწყვეტთ რამდენიმე დღეში რა გადაწყვეტილებას მივიღებთ," მაგრამ გარიცხვაზე საუბარი არ ყოფილა... ყველაფერს ვაკეთებთ, რომ გუნდი იქნას შენარჩუნებული, გუნდის ყველა წევრი იქნას შენარჩუნებული. თუ გუნდის წევრი იღებს საკუთარ გადაწყვეტილებას, დაველოდოთ. მსგავსი გადაწყვეტილების შესახებ დღეს არავის გამოუცხადებია,"-ამბობს მამუკა მდინარაძე.

საპარლამენტო უმრავლესობის შეხვედრის დასრულების შემდეგ ეკა ბესელიამ განაცხადა, რომ მომწიფდა ის მომენტი, როდესაც მან და რამდენიმე წევრმა საბოლოო გადაწყვეტილება უნდა მიიღონ.