გრიგოლ ვაშაძეს მხარს ისე დავუჭერთ, როგორც შევძლებთ, ინტელექტუალურადაც –ლევან ბერძენიშვილი

„ჩვენ მოვედით, რომ საპრეზიდენტო არჩევნებში გრიგოლ ვაშაძეს დავუჭიროთ მხარი, გაერთიანებულ ოპოზიციასთან კავშირზე საუბარი არ გვქონია. „რესპუბლიკური პარტია“ იმ რესურსებით, რაც მას აქვს, გრიგოლ ვაშაძეს, როგორც საპრეზიდენტო კანდიდატს, მხარს უჭერს. რა საშუალებებიც გვაქვს ორგანიზაციებში, მხარს ისე დავუჭერთ, როგორც შევძლებთ, ინტელექტუალურადაც“, – ამის შესახებ ლევან ბერძენიშვილმა გაერთიანებული ოპოზიციის საარჩევნო შტაბში განაცხადა, სადაც თამარ კორძაიასა და ხათუნა სამნიძესთან ერთად იყო მისული.

„მხარი ან სალომე ზურაბიშვილს ან გრიგოლ ვაშაძეს უნდა დაუჭირო. ყველა სხვა გადაწყვეტილება პოლიტიკური კრახია. პოლიტიკური პარტია, რომელიც საერთოს ამ ორს შორის ვერ პოულობს, ფაქტობრივად, თვითგანადგურების გზას ადგას. ამიტომ, დარწმუნებული ვარ, რომ ზოგიერთები თავიანთ მოსაზრებებს გადახედავენ“, – განაცხადა ლევან ბერძენიშვილმა.

გაერთიანებული ოპოზიციის საარჩევნო შტაბში „რესპუბლიკური პარტიის“ წევრებთან კონსულტაციები გაიმართა. შეხვედრას პრეზიდენტობის კანდიდატი გრიგოლ ვაშაძეც დაესწრო.