საქართველო არის ერთ-ერთი ქვეყანა, რომელიც გარე წყაროებიდან მნიშვნელოვანი საფრთხის ქვეშ დგას - ელიზაბეთ რუდი

საქართველო არის ერთ-ერთი ქვეყანა, რომელიც გარე წყაროებიდან მნიშვნელოვანი საფრთხის ქვეშ დგას, – ამის შესახებ საქართველში აშშ-ის ელჩის მოვალეობის შემსრულებელმა ელიზაბეთ რუდმა ბათუმში, თავდაცვისა და უსაფრთხოების კონფერენციის შემდეგ განაცხადა.

„მონაწილეობა მივიღე პანელზე სახელწოდებით, „ქვეყნები ზეწოლის ქვეშ – საფრთხეებთან გამკლავება“. ამ კონტექსტში საქართველო არის ერთ-ერთი ქვეყანა, რომელიც გარე წყაროებიდან მნიშვნელოვანი საფრთხის ქვეშ დგას. ასე რომ, ჩვენ ვისაუბრეთ იმ გზებზე, რომლითაც ჩვენ ვთანამშრომლობთ საქართველოსთან და სხვა ქვეყნებთან, რათა დავეხმაროთ გაუმკლავდნენ საფრთხეებს”, – განაცხადა რუდმა.

„ჩვენ ვისაუბრეთ იმაზე, თუ როგორ აძლიერებს ქვეყნებს მათი შიდა სტაბილურობისთვის გატარებული ღონისძიებები. ვისაუბრეთ მდგრადობის შესახებ, ინფორმაციისა და დეზინფორმაციის შესახებ, დემოკრატიული ინსტიტუტების გაძლიერების შესახებ და მთელი ქვეყნის მობილიზების შესახებ საერთო თავდაცვისთვის, რათა შეძლონ თანამედროვე მსოფლიოს გამოწვევებს გაუმკლავდნენ. ეს ყველაფერი არის ის, რითაც ამერიკის შეერთებული შტატები გვერდში უდგას საქართველოს და ეხმარება მას”, – განაცხადა ელიზაბეთ რუდმა.