ამ ეტაპზე არ არსებობს კორონავირუსის ფართოდ გავრცელების რისკი და შესაბამისად, ეპიდემიის საფრთხეც არ არსებობს - ტიკარაძე

საქართველო, თბილისი - 13:37 | 27.02.2020
ნანახია: 259

ვარწმუნებ მოსახლეობას, რომ ამ ეტაპზე საქართველოში არ არსებობს კორონავირუსის ფართოდ გავრცელების რისკი და შესაბამისად, ეპიდემიის საფრთხეც არ არსებობს - ამის შესახებ დღეს, მთავრობის სხდომაზე ჯანდაცვის მინისტრმა ეკატერინე ტიკარაძემ განაცხადა.

მისივე განმარტებით, ვირუსის დროულმა აღმოჩენამ შემდეგი გავრცელების რისკი შეამცირა. ჯანდაცვის მინისტრის განცხადებით, ამ მიმართულებით მუშაობა 24 საათიან რეჟიმში გრძელდება.

"28 იანვრის შემდეგ უწყებათაშორისი საბჭო მუშაობს ძალიან კოორდინირებულად და მადლობას ვუცხადებ ყველა იმ ორგანოს, რომელიც ჩვენთან ეფექტურად თანამშრომლობს. სწორედ ეს გახდა იმის მიზეზი, რომ გუშინ დღემდე არ დაფიქსირებულა საქართველოში გავრცელების არც ერთი შემთხვევა და ის ფაქტი, რომელიც დაფიქსირდა, იყო დროულად აღმოჩენილი, რამაც მოგვცა საშუალება, აღარ მომხდარიყო ვირუსის შემდეგი გავრცელება და ეს ადამიანი მოთავსებულია ინფექციურ საავადმყოფოში.

გუშინ ღამით ინფექციური საავადმყოფოდან იმ 13 პაციენტის გადაყვანა განხორციელდა საკარანტინო ზოლში, რომლებიც არ იყვნენ ინფიცირებულები. ამ დროისთვის ინფექციურ საავადმყოფოში იმყოფება 10 პაციენტი, აქედან 5 იტალიიდან ჩამოვიდა - 1 იტალიის მოქალაქეა, 4 კი ქართველია. 5 არის ირანიდან - 1 არის ქართველი, დანარჩენები არიან აზერბაიჯანის მოქალაქეები.

ჩვენ ვაგრძელებთ კოორდინირებულ მუშაობას. ამ დროისთვის გვაქვს საკმარისი ადგილები, რათა მოვახდინოთ იმ მოქალაქეების კარანტინში განთავსება, რომლებიც ახლო კონტაქტში იმყოფებოდნენ ინფიცირებულ ადამიანებთან და მოდიან საქართველოში მაღალი რისკის ზონებიდან.

ასეთი ლოკაციები საქართველოში სხვადსხვა ადგილზე გვაქვს. ვზრუნავთ, რომ მათ ჰქონდეთ შესაბამისი პირობები. ასევე, მობილიზებულია საავადმყოფოები, რომლებიც განლაგებულია როგორც ქუთაისში, ასევე ბათუმში და არის რამდენიმე საავადმყოფო თბილისში.

მე ვარწმუნებ ჩვენ მოსახლეობას, რომ ამ ეტაპზე საქართველოში არ არსებობს იმის რისკი, რომ მოხდეს კორონავირუსის ფართოდ გავრცელება და შესაბამისად, ეპიდემიის საფრთხე არ არსებობს. ჩვენ 24 საათიან რეჟიმში კვლავ გავაგრძელებთ მუშაობას ამ მიმართულებით", - განაცხადა ტიკარაძემ.




არქივი

მოგვძებნე Facebook-ზე