მასაჩუსეტსის შტატში გაზის გაჟონვის გამო 40-მდე სახლი აფეთქდა, არის მსხვერპლი

ამერიკის მასაჩუსეტსის შტატის 40-მდე სახლში გაზის გაჟონვის გამო აფეთქებები მოხდა. დაიღუპა ერთი და დაშავდა 13 ადამიანი. ამის შესახებ  ტელეარხი  NBC News-ი ადგილობრივ ხელისუფლებაზე დაყრდნობით იუწყება.

დაღუპული 11 წლის ლეონელ რობსონია, რომელიც საავადმყოფოში გარდაიცვალა. ავტომობილს, სადაც ბიჭი იმყოფებოდა, აფეთქების შედეგად ჩამოვარდნილი მილი დაეცა.

აფეთქებების მიზეზი გაზის კომპანია Columbia Gas-ში ბუნებრივი აირის მიწოდებაში გარკვეული დარღვევები გახდა.

ქალაქების ლოურენსის, ანდოვერისა და ჩრდილოეთ ანდოვერის მცხოვრებლებს, რომლებიც გაზს კომპანია Columbia Gas-დან იღებენ, სახლების დატოვებისკენ მოუწოდეს და გააფრთხილეს არ გამოიყენონ მობილური ტელეფონები და ელექტრომოწყობილობები, რათა ხანძრის გაჩენის საფრთხე არ შეიქმნას. ადგილობრივმა ელექტროენერგიის გამანაწილებელმა კომპანიამ, საფრთხის აცილების მიზნით, ქალაქებში ელქტრომომარაგება შეწყვიტა.