საბერძნეთში ხანძრის შედეგად დაღუპულთა რაოდენობამ 60-ს გადააჭარბა

საბერძნეთში ათენის სიახლოვეს ტყის ხანძრის შედეგად გარდაცვლილთა რაოდენობამ 60-ს გადააჭარბა. ხელისუფლების წარმომადგენლები მსხვერპლის კიდევ უფრო გაზრდას არ გამორიცხავენ. ამის შესახებ სააგენტო Reuters-ი იუწყება.

გავრცელებული ინფორმაციით, დაღუპულთა შორის ბევრი ბავშვია, ტყის მასივებში ხანძარი ჰაერის მაღალი ტემპერატურის გამო გაჩნდა.  „დაღუპულთა შორის ბევრი პატარა ბავშვია“- წერს ადგილობრივი მედია. აღნიშნულია, რომ უმეტესობა იმის გამო დაიღუპა, რომ ცეცხლმა მათ სახლებისა და მანქანების დატოვების საშუალება არ  მისცა. ზოგიერთმა მათგანმა თავის გადარჩენა ზღვის მეშვეობით სცადა, მაგრამ დაიხრჩო.  

ბოლო მონაცემებით, ტყის ხანძარს 50 ადამიანი ემსხვერპლა. ათენში საქართველოს საელჩოს ინფორმაციით, საქართველოს ორ მოქალაქესთან დაკავშირება ვერ ხერხდება.გუშინდელი ღამის განმავლობაში საელჩოს ცხელ ხაზს დაუკავშირდა საქართველოს სამი მოქალაქე, რომელთაც გაეწიათ შესაბამისი დახმარება, მათ შორის ერთ-ერთი მათგანი გვიან ღამით, უშუალოდ საკონსულოს სამსახურის თანამშრომლების მიერ იქნა გამოყვანილი ხანძრის ზონიდან.

საქართველოს მოქალაქეებს საელჩოსთან დაკავშირება საჭიროების შემთხვევაში, ცხელ ხაზზე, სატელეფონო ნომერზე  +306995779793  შეუძლიათ.