არჩილ გეგეშიძე ჯონ კერის ვიზიტის ფარგლებში გამართულ შეხვედრებზე არ გამოჩენილა

ამერიკის შეერთებულ შტატებში საქართველოს ელჩი არჩილ გეგეშიძე ჯონ კერის ვიზიტის ფარგლებში გამართულ შეხვედრებზე  არ გამოჩენილა.

2030.news-მა კითხვით მიმართა საქართველოს საგარეო საქმეთა მინისტრის მოადგილეს დავით ზალაკალიანს, თუმცა მან  შესაბამის კითხვაზე პასუხისგან თავი შეიკავა.

რაც შეეხება კითხვას, როდის მოხდება რეაგირება არჩილ გეგეშიძის განცხადებებთან დაკავშირებით, საგარეო საქმეთა მინისტრის მოადგილემ უპასუხა - "მთელი დღის განმავლობაში ჩართულები ვართ მნიშვნელოვანი ვიზიტის მიმდინარეობაში. არ გვქონია შესაძლებლობა, გვესაუბრა ელჩთან. უახლოეს დღეებში გვექნება მასთან გასაუბრების საშუალება. ჩვენც გვაინტერესებს, რამდენად შეესაბამება რეალობას განცხადებები, რომელიც გაკეთდა. ჯერჯერობით ნაჩქარევია გადაწყვეტილების მიღება. ჩვენ გვექნება შესაბამისი რეაგირება, თუმცა დღეს გამიჭირდება კითხვაზე პასუხი, როგორი იქნება ეს რეაგირება".

როგორც ცნობილია, ელჩი გეგეშიძე საქართველოს საგარეო უწყებამ რამდენიმე დღის წინ გაკეთებული განცხადებების შემდეგ თბილისში გამოიძახა.

არჩილ გეგეშიძემ  რამდენიმე ხნის წინ გააკეთა განცხადება, რომ პრორუსული პოლიტიკოსების არსებობა მმართველ გუნდში ქვეყანაში არსებულ პლურალისტურ გარემოზე მიუთითებს.

საქართველოს პრეზიდენტმა გიორგი მარგველაშვილმა აშშ-ში საქართველოს ელჩის ამ განცხადებას არაკომპეტენტური უწოდა.

"ეს იყო არაკვალიფიციური ელჩის არაკომპეტენტური განცხადება და არაკომპეტენტურობა არჩილ გეგეშიძემ არაერთხელ გამოავლინა", - აღნიშნა პრეზიდენტის პრესსპიკერმა ეკა მიშველაძემ 5 ივლისს გამართულ ბრიფინგზე.