არჩილ ხაბაძემ და დავით ბალაძემ რეპუბლიკური საავადმყოფოს მშენებლობის პროცესი მოინახულეს

აჭარის მთავრობის თავმჯდომარე არჩილ ხაბაძე, აჭარის ფინანსთა და ეკონომიკის მინისტრ დავით ბალაძესთან და აჭარის ჯანმრთელობის და სოციალური დაცვის მინისტრ ნუგზარ სურმანიძესთან  ერთად რეპუბლიკური საავადმყოფოს მშენებლობის პროცესს გაეცნო.

მშენებლობის მიმდინარეობის დეტალები მთავრობის წარმომადგენლებს შპს "საბა კონსტრაქშენის" წარმომადგენელმა და შპს "სტადიონის" დირექტორმა გააცნეს. ამ დროისთვის უკვე დასრულებულია ფუძის მოწყობის სამუშაოები. პროექტის მიხედვით 22107 კვ. მეტრ ტერიტორიაზე ორი 5 სართულიანი და ერთი 4 სართულიანი ბლოკი აშენდება.

მშენებლობაზე 30 ადამიანია დასაქმებული. ეს ციფრი სამომავლოდ 60-მდე გაიზრდება. სამედიცინო დაწესებულების მშენებლობა აჭარის ფინანსთა და ეკონომიკის სამინისტროს ბიუჯეტიდან 22 მლნ ლარით ფინანსდება. მრავალპროფილური საავადმყოფო 170 საწოლზე იქნება გათვლილი. სამედიცინო დაწესებულება თანამედროვე ტექნიკით და ინვენტარით იქნება აღჭურვილი და პაციენტებს მაღალი ხარისხის მომსახურებას შესთავაზებს. მრავალფუნქციური საავადმყოფოს მშენებლობა 2018 წლის გაზაფხულზე დასრულდება.