ბრუნო ბალვანერა და ნოდარ ხადური ერთობლივ ბრიფინგს გამართავენ

6 მაისს, სასტუმრო “Rooms Hotel Tbilisi“-ში ევრობანკის რეგიონალური დირექტორი კავკასიაში, მოლდოვასა და ბელარუსში, ბრუნო ბალვანერა და საქართველოს ფინანსთა მინისტრი, ნოდარ ხადური ერთობლივ ბრიფინგს გამართავენ.  

როგორც ცნობილია, ევროპის რეკონსტრუქციისა და განვითარების ბანკმა ახლახანს დაარსების 25 წლის თავი აღნიშნა. ბრიფინგზე ბალვანერა წარადგენს ამ ორ ათეულ წელზე მეტი ხნის განმავლობაში ევრობანკის მიერ განხორციელებულ მიღწევებს საქართველოში. ის ასევე ისაუბრებს წარმატებულ თანამშრომლობასა და ნაყოფიერ პოლიტიკურ დიალოგზე საქართველოს მთავრობასთან, სახელდობრ, ფინანსთა სამინისტროსთან.  

პრეს-კონფერენციას დაესწრებიან ევრობანკის უფროსი ბანკირები.

ბანკის ინფორმაციით, განხილვის ეტაპზე მყოფი პროექტების თვალსაზრისით, ევრობანკი საქართველოში დინამიკურ წელიწადს გეგმავს და აპირებს გააგრძელოს ეკონომიკის სტიმულირება ინვესტიციებითა და პოლიტიკური დიალოგის ხელშეწყობით. ევრობანკი კიდევ ერთხელ ადასტურებს საქართველოს ეკონომიკისა და კერძო სექტორის განვითარების კუთხით ნაკისრ ვალდებულებას.