ირაკლი შოთაძე: ფარული ჩანაწერების საქმეზე, პასუხს სხვადასხვა ქვეყნებიდანაც ველოდებით

საქართველოს მთავარი პროკურორის განცხადბით, ფარულ კადრებთან დაკავშირებული დანაშაულის გამოძიებაზე, ოცამდე სამართლებრივი დახმარების შუამდგომლობა არის გაგზავნილი სხვადასხვა ქვეყანაში. ირაკლი შოთაძემ ჟურნალისტებთან ასევე განაცხადა, რომ მსგავსი კატეგორიის საქმეების გამოძიება საკმაო დროს საჭიროებს.

„ის ინფორმაცია, ის მტკიცებულებები, რაც საჭიროა გამოძიებისათვის ობიექტური ჭეშმარიტების დასადგენად ჩვენს ხელთ არ არის. შესაბამისად, ჩვენ გვჭირდება უცხოელი კოლეგების დახმარება, რა მხრივადაც უკვე ოცამდე სამართლებრივი დახმარების შუამდგომლობა გვაქვს გაგზავნილი სხვადასხვა ქვეყანაში. ნაწილი მოსული არის პასუხები, ნაწილზე ველოდებით. ასევე, საქართველოში არის ჩატარებული მთელი რიგი საგამოძიებო მოქმედებები. რა თქმა უნდა, არის წინსვლა, თუმცა უფრო მეტ დეტალებზე გამოძიების ინტერესებიდან გამომდინარე ვერ ვისაუბრებ. რა თქმა უნდა, მაღალი ინტერესიდან გამომდინარე გამოძიების შედეგების შესახებ საზოგადოებას დეტალურ ინფორმაციას მივაწვდით“, - აღნიშნა ირაკლი შოთაძემ.