რუსეთი ოკუპირებულ სამხრეთ ოსეთს ე.წ. ეროვნული ოლიმპიური კომიტეტის შექმნაში დახმარებას დაპირდა

რუსეთის ოლიმპიური კომიტეტი ოკუპირებული სამხრეთ ოსეთის ე.წ. ხელისუფლებას სპორტის განვითარებასა და ე.წ. ეროვნული ოლიმპიური კომიტეტის შექმნაში დახმარებას დაპირდა.
ე.წ. ეროვნული ოლიმპიური კომიტეტის შექმნის შესახებ საუბარი იყო სეპარატისტების ლიდერის ლეონიდ თიბილოვის, რუსეთის ოლიმპიური კომიტეტის წარმომადგენლებისა და რუსეთის მოჭიდავეთა ნაკრების მთავარი მწვრთნელის ჯამბოლათ თედეევის შეხვედრაზე. შეხვედრას ესწრებოდა ოკუპირებული აფხაზეთის ე.წ. ვიცეპრეზიდენტი ვიტალი გაბნიაც.

რუსეთის ოლიმპიური კომიტეტის წარმომადგენლების თქმით, ე.წ. სამხრეთ ოსეთი სპორტსმენების სამჭედლოა და რუსული მხარე ყველაფერს გააკეთებს სპორტის აღორძინებისთვის.

თედეევი კი იმედს არ კარგავს რომ ოლიმპიურ თამაშებში ოსი სპორტსმენები მალე მონაწილეობას .ე.წ. სამხრეთ ოსეთის დროშის ქვეშ მიიღებენ. სეპარატისტებს იმედი საერთაშორისო ოლიმპიური კომიტეტის მიერ კოსოვოს ეროვნული ოლიმპიური კომიტეტის აღიარების შემდეგ ჩაესახათ და მომავალი წლიდან ორგანიზციაში განაცხადის შეტანასაც კი გეგმავენ.