ქობულეთს განახლებული სახანძრო-სამაშველო შენობა ექნება

დღეს აჭარის მთავრობის თავმჯდომარე არჩილ ხაბაძე ქობულეთში სახანძრო-სამაშველო შენობის გახსნას დაესწრო.

განახლებული შენობის გახსნის ცერემონიას შს მინისტრის მოადგილე მერაბ მალანია, შსს-ს საგანგებო სიტუაციების მართვის სააგენტოს დირექტორი ზვიად ქაწაშვილი, აჭარის უმაღლესი საბჭოს თავმჯდომარე ავთანდილ ბერიძე და ადგილობრივი ხელისუფლების წარმომადგენლები ესწრებოდნენ. სტუმრებმა სამმართველოს გარემონტებული შენობა, სახანძრო-სამაშველო ტექნიკა და სრული აღჭურვილობა დაათვალიერეს. ახლადგარემონტებული, ორსართულიანი შენობა უახლესი ტექნიკითა და ინვენტარით აღჭურვა. შენობაში 47 მეხანძრე-მაშველი და 6 თანამშრომელი იმუშავებს.

ქობულეთს 6 სახანძრო და 2 სამაშველო ავტომანქანა მოემსახურება. მეხანძრე-მაშველებმა სტუმრებისთვის სიმულაციური ჩვენებაც გამართეს. მათ სიმაღლიდან „დაზარალებულის“ სპეციალური საკაცით ჩამოყვანისა და სიმაღლიდან სწრაფი დაშვების ოპერაცია განახორციელეს. „უსაფრთხოების საჭირო ზომები და წყალზე სამაშველო ზედამხედველობა ტურისტული რეგიონისათვის მართლაც რომ უმნიშვნელოვანესია.მოხარული ვარ, რომ ამ სერვისის გაუმჯობესებისა და საერთაშორისო სტანდარტების მიახლოების საქმეში გვაქვს დიდი წინსვლა.

ბოლო სამი წლის მანძილზე რეგიონში ზღვაში დაღუპულთა მაჩვენებლების შემცირება შეინიშნება, რაც უპირველეს ყოვლისა გამართული სამაშველო სამსახურის დამსახურებაა“ - განაცხადა არჩილ ხაბაძემ და სამაშველო სამსახურს მომავალშიც წარმატებები უსურვა.