პროტესტის გაჩერება არ შეიძლება, ეს ერთადერთი საჯარო დემონსტრირებაა იმისა, რომ ამ ქვეყანაში მოქალაქეები არ ეგუებიან დიქტატურას - ზურაბ ჯაფარიძე

რუსთაველის გამზირზე საპროტესტო აქციას კოალიცია "ცვლილებისთვის" ერთ-ერთი ლიდერი, ზურაბ გირჩი ჯაფარიძე შეუერთდა. 

მისი თქმით, რუსთაველის გამზირზე პროტესტის გაჩერება არ შეიძლება, რადგან ერთადერთი ცოცხალი პოლიტიკური პროცესია. 

"კარგი შეგრძნებაა ძალიან [აქციაზე დაბრუნება]. ცოტა უცნაური შეგრძნება არის, რაც დილიდანვე მაქვს, ღია სივრცეებთან მიმართებაში, ვერ ავხსნი რა გრძნობა არის, მაგრამ უცნაური განცდა მაქვს, გადაჩვეული ვარ. 

რუსთაველზე გამოსვლა, ცხადია, კარგია ძალიან. რუსთაველზე კი არა ქუჩაში გამოსვლაც კარგია, აქ ხომ მითუმეტეს, სადაც პროტესტია. 

[მოტივაცია] იგივეა რაც მანამდე იყო. რომ ამ პროტესტის გაჩერება არ შეიძლება, ეს პროტესტი არის ყველაზე მნიშვნელოვანი რამე, რაც ახლა აქ ხდება, ერთადერთი ცოცხალი პოლიტიკური პროცესია, ერთადერთი საჯარო დემონსტრირებაა იმისა, რომ ამ ქვეყანაში მოქალაქეები არ ეგუებიან დიქტატურას, რომლის დამყარებასაც ცდილობენ. ამიტომ, აქ დგომა არის მნიშვნელოვანი ნებისმიერი მოქალაქის, რომელსაც ამ ქვეყანაში ცხოვრების გაგრძელება უნდა, იმაზე აღარ არის ლაპარაკი გინდა თუ არა შვილებმა აქ იცხოვრონ, შენ თვითონ თუ გინდა აქ გააგრძელო ცხოვრება, უნდა გამოხვიდე და აქ იდგე როცა მოახერხებ მაშინ," - განაცხადა ზურა ჯაფარიძემ.