ახალი საკანონმდებლო ინიციატივით დივიდენდის გაცემისა და კოოპერატივის სარეზერვო ფონდში არსებული თანხის განკარგვის წესი, განისაზღვრება

„სასოფლო-სამეურნეო კოოპერატივის შესახებ“ საქართველოს კანონში ცვლილებები შედის. როგორც სოფლის მეურნეობის მინისტრის პირველი მოადგილე დავით გალეგაშვილი აცხადებს, კანონპროექტი ითვალისწინებს ასოცირებული წევრის ინსტიტუტის და დამატებითი საპაიო შენატანების შემოღებას.

„ასევე, განისაზღვრება თუ რა არის კოოპერაციული შემოსავალი. დაწესდება შეზღუდვა კოოპერატივის არა წევრებისაგან პროდუქციის შესყიდვაზე ან და მათთვის მომსახურეობის გაწევაზე. ასევე, კოოპერატივის წევრთა რეესტრის წარმოებაზე, რომელსაც კანონის მიღების შემდეგ სოფლის მეურნეობის მინისტრი განსაზღვრავს“, - განმარტა მომხსენებელმა.

მისივე თქმით, კანონპროექტით, განისაზღვრება დივიდენდის გაცემის და კოოპერატივის სარეზერვო ფონდში არსებული თანხის განკარგვის წესი. „კიდევ ერთი მთავარი ცვლილება არის ის, რომ სააგენტოს, რომელიც მთავრობის მხრიდან მართავს კოოპერატივებთან ურთიერთობს, მას მიეცემა კოოპერატივებზე გრანტების გაცემის უფლებამოსილება. „უკვე წელიწადზე მეტია რაც საქართველოში კოოპერატივები იქმნება. დრომ მოიტანა და კანონში ცვლილების შეტანით, ჩვენ უფრო მეტად ვაზუსტებთ თუ რას ნიშნავს კოოპერაცია. შპს-ებს ან სხვა ორგანიზაციებს, მათ, ვისაც ამის იმედი ჰქონდათ, უკვე ნაკლები ინტერესი ექნებათ შეღავათების მიღებისა, იმის იმედით, რომ არარეალური კოოპერატივებით შეძლებდნენ შეღავათების ან გრანტებს უცხოელებისა თუ მთავრობისგან მიღებას“, - განაცხადა დავით გალეგაშვილმა.

კანონპროექტის მიზანია სასოფლო-სამეურნეო კოოპერატივის შიდა საწარმოო ურთიერთობების მოწესრიგება და სასოფლო-სამეურნეო კოოპერატივის გამართული მოდელის შექმნა, რომელიც წევრთა შრომითი რესურსების კაპიტალიზაციის გააქტიურებაზე იქნება მიმართული.

გარდა ამისა, ცვლილება ასევე, მიზნად ისახავს სასოფლო-სამეურნეო კოოპერატივების განვითარების ხელშემწყობი პროგრამების ადმინისტირების მოქნილი მექანიზმის შესაქმნელად სსიპ - სასოფლო-სამეურნეო კოოპერატივების განვითარების სააგენტოსთვის სასოფლო-სამეურნეო კოოპერატივის სტატუსის მქონე სუბიექტებზე გრანტის გაცემის უფლებამოსილების მინიჭებას. ასევე, კანონპროექტი ემსახურება წევრთა რეესტრის წარმოების ერთიანი სტანდარტის დანერგვას და მასთან დაკავშირებული რისკების მაქსიმალურად დაზღვევას.