ლაზარე გრიგორიადისს მამის, ბექა გრიგორიადისის დაჭრის ფაქტზე ერთი წლითა და ექვსი თვით თავისუფლების აღკვეთა მიესაჯა

საქართველო, თბილისი - 19:20 | 25.09.2023
ნანახია: 2800

ლაზარე გრიგორიადისი მამის, ბექა გრიგორიადისის დაჭრის საქმეზე სასამართლომ დამნაშავედ ცნო და მას 1 წლითა და 6 თვით თავისუფლების აღკვეთა მიუსაჯა.

"ინტერპრესნიუსის" ინფორმაციით, სასამართლომ ლაზარე გრიგორიადისი დამნაშავედ ცნო ბექა გრიგორიადისის მანქანის დაზიანებაშიც და ამისთვის სასჯელის სახით 3 000-ლარიანი ჯარიმა დააკისრა, თუმცა მძიმე სასჯელმა აღნიშნული სასჯელი შთანთქა.

ლაზარე გრიგორიადისი წარდგენილ ბრალდებას აღიარებს, დაზარალებულს კი მომხდარზე პრეტენზია არ აქვს. სასამართლოზე ბექა გრიგორიადისმა განაცხადა, რომ "ძალიან მთვრალი იყო და ბავშვი არაფერ შუაში იყო", რის შემდეგაც, მოსამართლემ ის დარბაზიდან გააძევა.

საუბარია 2021 წლის საქმეზე, სადაც ლაზარე გრიგორიადისს მამის, ბექა გრიგორიადისის ჯანმრთელობის განზრახ მსუბუქ დაზიანებასა და მისი კუთვნილი ავტომანქანის დაზიანებას ედავებოდნენ.

31 მარტს სასამართლომ 21 წლის ლაზარე გრიგორიადისს აღკვეთი ღონისძიების სახით პატიმრობა შეუფარდა. ის 29 მარტს დააკავეს - შსს-ის განცხადებით, მან 7-9 მარტის აქციებზე პოლიციელებს ქვები და ე.წ. მოლოტოვის კოქტეილები ესროლა.




არქივი

მოგვძებნე Facebook-ზე