პრესის თავისუფლების დღეს მედიის წარმომადგენლები ნიკა გვარამიას სოლიდარობის აქციას მართავენ

3 მაისს პრესის თავისუფლების მსოფლიო დღე აღინიშნება. 1993 წელს, გაეროს გენერალურმა ასამბლეამ ეს დღე თავისუფალი პრესის მნიშვნელობის ხაზგასასმელად გამოაცხადა. 3 მაისი აღნიშნავს პრესის თავისუფლების ფუნდამენტურ პრინციპებს, აჯამებს პრესის თავისუფლების მდგომარეობას მთელს მსოფლიოში, მხარდაჭერას უცხადებს მედიას მათ დამოუკიდებლობაზე თავდასხმის შემთხვევებში, აერთიანებს მედიის წარმომადგენლებს პროფესიული ეთიკის საკითხების გარშემო, პატივს მიაგებს სამსახურებრივი მოვალეობის შესრულებისას დაღუპულ ჟურნალისტებს და მთავრობებს პრესის თავისუფლების ჭრილში არსებულ ვალდებულებებს შეახსენებს.

პრესის თავისუფლების მსოფლიო დღეს, 15:00 საათზე, „მედიის ადვოკატირების კოალიცია“, მედიის წარმომადგენლებთან და არასამთავრობო ორგანიზაციებთან ერთად, ნიკა გვარამიას სოლიდარობის აქციას გამართავს. პრეზიდენტის სასახლესთან შეკრებილი თანამოაზრეები „მთავარი არხის“ დამფუძნებლის პატიმრობიდან გათავისუფლებას მოითხოვენ.