მიხეილ სააკაშვილის გადასაყვანად სპეციალური თვითმფრინავიც მზად არის, მაგრამ ჯერ საქართველოს მხრიდან სიჩუმეა, - ამის შესახებ ევროპარლამენტარმა, ანა ფოტიგამ სტრასბურგში პრესკონფერენციაზე განაცხადა. ფოტიგას კომენტარს პირველი არხი ავრცელებს.

მისი თქმით, მათთვის ცნობილია მიხეილ სააკაშვილის მდგომარეობა, რაზეც არაერთი განცხადება გაკეთდა ევროპარლამენტის ოფიციალურ დოკუმენტებში და, რეზოლუციებში.

„იმედი გვაქვს, რომ დაუყოვნებლივ გადაიდგმება ნაბიჯები ევროკავშირისა და წევრი ქვეყნების მხრიდან, რომ უფრო დაჩქარდეს ქმედებები, რათა ის გათავისუფლდეს, – განაცხადა ანა ფოტიგამ.

მისივე თქმით, სააკაშვილის სიცოცხლე საფრთხეშია და სწრაფად მოქმედებაა საჭირო.

„მაღალი დონის სამხედრო-სამედიცინო ექსპერტების გუნდი მზადაა, მზადაა ასევე ტრანსპორტირების საკითხები, სპეციალური თვითმფრინავიც მზად არის, მაგრამ ჯერ საქართველოს მხრიდან სიჩუმეა. ევროკავშირის ინსტიტუტების მხარდაჭერა არსებობს. ასე რომ, პოლონეთის და ევროკავშირის მხრიდან ყველაფერი მომზადებულია. დრო ამ შემთხვევაში გადამწყვეტია და ის დაუყოვნებლივ უნდა გადაიყვანონ სათანადო მკურნალობის მიზნით ნებისმიერ ევროპულ ან ევროატლანტიკურ სახელმწიფოში. მისი სიცოცხლე საფრთხეშია და სწრაფად მოქმედებაა საჭირო“, – განაცხადა ფოტიგა.