საქართველოსა და რუსეთს შორის ფრენების აღდგენის შემთხვევაში პროცესში ჩართული კომპანიები დასანქცირდებიან

საქართველოსა და რუსეთს შორის ფრენების აღდგენის შემთხვევაში პროცესში ჩართული კომპანიები დასანქცირდებიან - სახელმწიფო დეპარტამენტი

საქართველო, თბილისი - 13:03 | 03.02.2023

ნანახია: 403

ამერიკის შეერთებული შტატების სახელმწიფო დეპარტამენტის ცნობით, საქართველოსა და რუსეთს შორის ფრენების აღდგენის შემთხვევაში, იმ კომპანიებს, რომლებიც საქართველოში რუსულ კომპანიებს მოემსახურებიან, სანქციები დაუწესდებათ. ამის შესახებ ნათქვამია უწყების ამერიკის ხმასთან მიცემულ ინტერვიუში.

"ბევრი დასავლური ქვეყანა, მათ შორის, შეერთებული შტატებიც, კრძალავს რუსული თვითმფრინავების საკუთარ საჰაერო სივრცეში შესვლას. ჩვენ შეგვაშფოთებს ის, თუ რუსეთსა და საქართველოს შორის ფრენები განახლდება, იმის გათვალისწინებით, რომ საქართველოს აეროპორტებში კომპანიები შესაძლოა სანქციების სამიზნე გახდნენ, თუ ისინი მოემსახურებიან თვითმფრინავებს, რომლებიც ექვემდებარება იმპორტისა და ექსპორტის დამატებით კონტროლს". - წერს სახელმწიფო დეპარტამენტი.

18 იანვარს სერგეი ლავროვმა თქვა, რომ იმედოვნებს, საქართველოსთან პირდაპირი ფრენების განახლებას მალე შეძლებენ. 19 იანვარს "ქართული ოცნების" თავმჯდომარემ, ირაკლი კობახიძემ რუსეთის საგარეო საქმეთა მინისტრის განცხადების პასუხად აღნიშნა, რომ რუსეთთან პირდაპირი ფრენების აღდგენა მისასალმებელია.