ასეთი გაბუქებული სათაურების აქციები „ქართულ ოცნებას“ ნოყიერ ნიადაგს უქმნის, შემდეგი არჩევნებისთვის დაარწმუნოს თავისი ამომრჩეველი, რომ „ქართულ ოცნებას“ ამ ქვეყანაში ალტერნატივა არ აქვს - ლევან იოსელიანი

ასეთი გაბუქებული სათაურების აქციები, კიდევ უფრო აძლიერებს „ქართულ ოცნებას“ და უფრო ნოყიერ ნიადაგს უქმნის, შემდეგი არჩევნებისთვის დაარწმუნოს თავისი ამომრჩეველი, რომ „ქართულ ოცნებას“ ამ ქვეყანაში ალტერნატივა არ აქვს, - ამის შესახებ პარტია „მოქალაქეების“ წევრმა ლევან იოსელიანმა 24 თებერვალს დაგეგმილ აქციასთან დაკავშირებით განაცხადა.

იოსელიანის თქმით, ამ აქციაზე იმდენი ხალხი არ მივა, რომ პოლიტიკური ცვლილებები გამოიწვიოს.

„ასეთი რაღაცნაირი გაბუქებული სათაურების აქციები, მგონი, ახლა ამას ახალი ეროვნული მოძრაობა დაერქვა, ემსახურება მხოლოდ ერთ საქმეს – კიდევ უფრო აძლიერებს „ქართულ ოცნებას“ და უფრო ნოყიერ ნიადაგს უქმნის, რათა ამ ყველაფრის, ამ რაღაცა უაზრო გზავნილების გათვალისწინებით, შემდეგი არჩევნებისთვის დაარწმუნოს თავისი ამომრჩეველი, რომ „ქართულ ოცნებას“ ამ ქვეყანაში ალტერნატივა არ აქვს.

მგონია, რომ ასეთი აქციები ამის გაძლიერებას ემსახურება. ყველას კარგად გვესმის, რომ ამ აქციაზე, ყოველ შემთხვევაში, მათ დაძახილზე იმდენი ხალხი არ მოვა, რომ რაღაცა პოლიტიკური ცვლილებები გამოიწვიოს. რაც შეეხება უკრაინაში ომის დაწყების წლისთავს, ამაზე შეიძლება ადამიანები ისედაც გამოვიდნენ და ეს არანაირ კავშირში არ იქნება რომელიმე პოლიტიკური ლიდერის პოლიტიკურ ინტერესთან“, – აღნიშნა ლევან იოსელიანმა.

როგორც ცნობილია, "დროას", "გირჩი-მეტი თავისუფლების", "სტრატეგია აღმაშენებლის" ლიდერებმა და საზოგადოების სხვადასხვა სფეროს წარმომადგენლებმა 24 თებერვალს თბილისში, რუსთაველის გამზირზე უკრაინის მხარდამჭერი აქცია დააანონსეს.