უკრაინის თავდაცვის მინისტრის მოადგილე შეიარაღებული ძალებისთვის პროდუქციის შესყიდვასთან დაკავშირებული სკანდალის ფონზე, თანამდებობიდან გათავისუფლებას ითხოვს

უკრაინის თავდაცვის მინისტრის მოადგილემ, ვიაჩესლავ შაპოვალოვმა, უკრაინის შეიარაღებული ძალებისთვის პროდუქციის შესყიდვასთან დაკავშირებული სკანდალის ფონზე, თანამდებობიდან გათავისუფლებას ითხოვს. ინფორმაციას უკრაინული მედია ავრცელებს.

 მედიის ცნობით, უკრაინის თავდაცვის მინისტრმა, ოლექსეი რეზნიკოვმა შაპოვალოვის თხოვნა დააკმაყოფილა და შესაბამისი წარდგინებით უკრაინის მინისტრთა კაბინეტს მიმართა.

მედიის ცნობით, ვიაჩესლავ შაპოვალოვმა, რომელიც პასუხისმგებელი იყო უკრაინის შეიარაღებული ძალების ლოჯისტიკაზე, ითხოვა სამსახურიდან გაათავისუფლონ, რათა საფრთხე არ შეექმნას უკრაინის შეიარაღებული ძალების სტაბილურ მომარაგებას.

"მიუხედავად იმისა, რომ გაჟღერებული ბრალდებები უსაფუძვლოა, ვიაჩესლავ შაპოვალოვის განცხადება თანამდებობიდან გათავისუფლების შესახებ ღირსეული ქმედებაა ევროპული და დემოკრატიული პოლიტიკის ტრადიციების გათვალისწინებით, დემონსტრირებაა იმისა, რომ თავდაცვის ინტერესები უფრო მაღალია, ვიდრე ნებისმიერი თანამდებობა", - ნათქვამია ინფორმაციაში.

უკრაინის თავდაცვის სამინისტროს მიაჩნია, რომ ასეთი ნაბიჯი შეინარჩუნებს საზოგადოების და საერთაშორისო პარტნიორების ნდობას და უზრუნველყოფს ობიექტურობას დამატებითი დაზუსტებისა და შესაძლო გამოძიების დროს.