გერმანიის ბუნდესტაგმა უკრაინაში ჰოლოდომორი გენოციდად აღიარა

გერმანიის ბუნდესტაგმა რეზოლუცია მიიღო, რომლითაც გენოციდად აღიარებს ჰოლოდომორს უკრაინაში.

როგორც ბუნდესტაგის მიღებულ რეზოლუციაშია ნათქვამი, ჰოლოდომორი წარმოადგენს "დანაშაულს კაცობრიობის წინააღმდეგ“, რომელზე პასუხისმგებელიც არის იოსებ სტალინი და საბჭოთა კავშირის პოლიტიკური ხელმძღვანელობა.

„შიმშილით მასობრივი სიკვდილი არ იყო მოსავლის არქონის შედეგი, ეს იყო იოსებ სტალინის საბჭოთა კავშირის პოლიტიკური ლიდერების პასუხისმგებლობა. ჰოლოდომორი კაცობრიობის წინაშე ჩადენილი დანაშაულია და დღევანდელი პოზიციიდან ცხადია, მისი, როგორც გენოციდის ისტორიულ-პოლიტიკური კლასიფიკაცია. უკვე 1931/1932 წლის ზამთრისთვის ასობით ათასი ადამიანი დაიღუპა შიმშილისგან სოფლებში. მიუხედავად ამისა, გრძელდებოდა მოსავლის ძალადობრივი რეკვიზიცია. შიმშილი გამოიყენებოდა, როგორც დამატებითი სასჯელი, სათანადო მოცულობით შეუსრულებლობის შემთხვევაში კი, მოითხოვდნენ და კონფისკაცია დამატებით ეხებოდა მარცვლეულსა და სხვა პროდუქტებს. დაზარალებული რაიონები შემოსაზღვრული იყო, რომ მოშიმშილეები ქალაქიდან არ გაქცეულიყვნენ, საკვები კი რეგიონებში არ მიეწოდებინათ“, – ნათქვამია მიღებულ რეზოლუციაში.

23-24 ნოემბერს, ჰოლოდომორი უკრაინელების გენოციდად მოლდოვის, რუმინეთისა და ირლანდიის პარლამენტებმა აღიარეს. მათ გარდა, ჰოლოდომორი უკრაინელი ხალხის გენოციდად კიდევ 19 ქვეყანას აქვს აღიარებული.

ჰოლოდომორს 1932-33 წლებში უკრაინაში დაახლოებით ოთხი მილიონი (ზოგიერთი მონაცემებით 10 მილიონამდე) ადამიანი იმსხვერპლა.