პროკურატურის შუამდგომლობა, მიხეილ სააკაშვილის ადვოკატის ნიკა გვარამიას აცილების შესახებ სასამართლომ არ დააკმაყოფილა

საქალაქო სასამართლოს მოსამართლეთა კოლეგიამ არ დააკმაყოფილა პროკურატურის შუამდგომლობა, სააკაშვილის საქმიდან მისი ერთ-ერთი ადვოკატის, ნიკა გვარამიას ჩამოცილების შესახებ. ნიკა გვარამია საქმეზე მესამე პრეზიდენტის ინტერესების დაცვას გააგრძელებს.

აღნიშნული შუამდგომლობით მოსამართლეთა კოლეგიას ჯარჯი წიკლაურმა, თბილისის საქალაქო სასმართლოში მიმდინარე პროცესზე მიმართა და მოტივად 2007 წლის 7 ნოემბერის მოვლენების დროს, ნიკა გვარამიას თანამდებობა დაასახელა.

​სწორედ 7 ნოემბრის ეპიზოდის განხილვა მიმდინარეობს ამ წუთებში საქალაქოში.

პროკურორმა ჯარჯი წიკლაურმა განაცხადა, რომ იმ პერიოდში ნიკა გვარამიას პოლიტიკური თანამდებობა ეკავა პროკურატურაში, მიმდინარე მოვლენებში პირადად იყო ჩართული და ჰქონდა საქმის მასალებზე წვდომა, ახლა კი მისი თქმით, დაუშვებელია ამავე საქმეზე მხარედ იყოს ჩართული.