ის ფაქტი, რომ ექიმების კონსილიუმი შეკრებილია ნინო ლომჯარიას მამიდაშვილის ხელმძღვანელობით, გარკვეულ ეჭვებს ბადებს - ნიკოლოზ სამხარაძე

ბოლო სამ წელში შიმშილობის ათასი შემთხვევა იყო და მაშინ სად იყო სახალხო დამცველი, თუ ციხე არ პასუხობდა მკურნალობისთვის საჭირო მოთხოვნებს? - ასე ეხმიანება პარლამენტის საგარეო საქმეთა კომიტეტის თავმჯდომარე ნიკოლოზ სამხარაძე სახალხო დამცველის ეგიდით შექმნილი ექსპერტთა ჯგუფის დასკვნას. ამის შესახებ სამხარაძემ "პირველ არხთან" საუბრისას განაცხადა.

მისი თქმით, ის ფაქტი, რომ ექიმების კონსილიუმი შეკრებილია ნინო ლომჯარიას მამიდაშვილის ხელმძღვანელობით, გარკვეულ ეჭვებს ბადებს.

„ექიმების დასკვნაზე პასუხის გაცემა გამიჭირდება, რადგან ექიმი არ ვარ და სამედიცინო განათლება არ მაქვს, თუმცა ის ფაქტი, რომ ექიმების კონსილიუმი შეკრებილია ნინო ლომჯარიას მამიდაშვილის ხელმძღვანელობით, გარკვეულ ეჭვებს ბადებს. საზოგადოებისთვის ამ ექიმთა პოლიტიკური პრეფერენციებიც საჯარო და ნათელი გახდა. ამ შიმშილობამ ექიმებშიც კი პოლიტიკური ელფერი მიიღო. ამიტომ, არავინ აღარავის ენდობა და ნდობა ამ ადამიანების მიმართ უკვე აღარ არსებობს. მეორე საკითხია ის, რომ აქამდე, საქართველოში საპატიმრო დაწესებულებაში შიმშილობდნენ. თუ სწორად მახსოვს, ბოლო სამ წელში შიმშილობის ათასი შემთხვევა იყო და მაშინ სად იყო სახალხო დამცველი, თუ ციხე არ პასუხობდა მკურნალობისთვის საჭირო მოთხოვნებს? ამ შემთხვევაში, ათასი მოშიმშილე პატიმრის უფლება არ ირღვეოდა? ეს ყველაფერი სახალხო დამცველის მხრიდან სხვა მოშიმშილე პატიმრების მიმართ კითხვებს აჩენს. კონსილიუმის საკითხმა უფრო მეტი კითხვა გააჩინა, ვიდრე პასუხებია გაცემული და საზოგადოება პასუხებს იმსახურებს“, – განაცხადა ნიკოლოზ სამხარაძემ.

შეგახსენებთ, გუშინ, გამოქვეყნდა სახალხო დამცველის მიერ შექმნილი ექსპერტთა ჯგუფის დასკვნა, რომლის თანახმადაც სააკაშვილის ჯანმრთელობის მდგომარეობა კრიტიკულია და მისი მკურნალობის გაგრძელება დაუყოვნებლივ რეკომენდებულია ფუნქციურად გამართულ, დიდი გამოცდილების მქონე პოლიპროფილურ ჰოსპიტალში.