ოპოზიციის რამდენიმე წარმომადგენელმა მთხოვა, სააკაშვილის გადაყვანაზე მეშუამდგომლა, თანახმა იყვნენ გორის ჰოსპიტალზეც, შემდეგ თქვეს, ოსებისთვის აპირებენ გადაცემასო - კახა კუჭავა

რამდენიმე ოპოზიციური პოლიტიკური პარტიის წარმომადგენელმა მთხოვა, პარლამენტის მხრიდან მეშუამდგომლა სააკაშვილის გადაყვანაზე და გორის ჰოსპიტალზეც იყვნენ თანახმა. ზუსტად მეორე დღეს ოპოზიციური სპექტრი ამბობს, რომ გორში აპირებენ გადაყვანას და შემდეგ ოსებზე გადაცემასო, – განაცხადა საქართველოს პარლამენტის თავმჯდომარე კახა კუჭავამ პარლამენტში, ბიუროს დღევანდელ სხდომაზე.


„სამწუხაროა განცხადებები, მათ შორის სხვადასხვა სექტორის წარმომადგენლებისგან, არა მხოლოდ ექიმებისგან. ერთი დღე იყო ძალიან მძიმედ, ცუდად, ვერ დადიოდა, რამდენიმე საათში გახდა კარგად,  რადგან სასამართლოზე უნდოდათ მონაწილეობის მიღება. სიმართლე სადაა ვეღარ გავიგე. აი, ესაა რეალური ტრაგედია. ასევე ტრაგედიაა, როდესაც მანიპულირება ხდება ფაქტებით.

როდესაც მოსული იყო რამდენიმე ოპოზიციური პოლიტიკური პარტიის წარმომადგენელი, მთხოვეს, პარლამენტის მხრიდან მეშუამდგომლა გადაყვანაზე და გორის ჰოსპიტალზეც იყვნენ თანახმა, ზუსტად მეორე დღეს ოპოზიციური სპექტრი ამბობს, რომ გორში აპირებენ გადაყვანას და შემდეგ ოსებზე გადაცემასო. თან პრობლემის გადაჭრისთვის ვითომ გზებს გვთავაზობენ და ამავე დროს, ცდილობენ ამავე საკითხებით მანიპულირებას და წინსწრებით, გარკვეული სპეკულაციებით უფრო დაძაბონ მდგომარეობა“, – განაცხადა კახა კუჭავამ.