თბილისის მერიაში ცხოველთა მონიტორინგის სააგენტოს 2015 წლის საქმიანობის ანგარიშის პრეზენტაცია გაიმართა

საქართველო, თბილისი - 11:22 | 10.02.2016

ნანახია: 1972

ცხოველთა მონიტორინგის სააგენტომ გასული წლის ანგარიში წარადგინა. როგორც ანგარიშის წარდგენისას სააგენტოს დირექტორმა თემურ ფხალაძემ აღნიშნა, იკვეთება პროგრესი ცხოველების მოვლა-პატრონობისა და მათი პოპულაციების მართვა-კონტროლის გასაუმჯობესებლად თანამედროვე, ჰუმანური, განვითარებულ ქვეყნებში აპრობირებული მეთოდებით.

ამასთან, თემურ ფხალაძემ წარადგინა მუნიციპალური თავშესაფრის საქმიანობის ანალიზი და რეკონსტრუქციის შედეგები.

სააგენტოს ხელმძღვანელმა ასევე მიმოიხილა ქალაქში უმეთვალყურეო ცხოველების არსებობით შექმნილი პრობლემები, მათი გადაჭრის გზები და ამ მიზნით დაგეგმილი პროექტები.

თემურ ფხალაძის განცხადებით, მნიშვნელოვანია მოსახლეობის ცნობიერების ამაღლება.

ანგარიშის წარდგენისას ხაზი გაესვა ე.წ. „სანიტარულ-ვეტერინარული კორდონის“ ამოქმედების მნიშვნელობას ქალაქისათვის, რომელსაც წინ უსწრებდა უპატრონო ცხოველების დათვლის პროცესი.

თბილისის მერიაში გამართულ შეხვედრას ესწრებოდნენ თბილისის მერის მოადგილე, ირაკლი ლექვინაძე, ცხოველთა მონიტორინგის სააგენტოს და არასამთავრობო ორგანიზაციების წარმომადგენლები.