თალიბებმა ოთხი ადამიანი საჯაროდ სიკვდილით დასაჯეს

„თალიბანმა“ ჰერათის პროვინციაში ოთხი ადამიანი საჯაროდ სიკვდილით დასაჯა. თალიბები მათ ადამიანების გატაცებაში ადანაშაულებდნენ.

ოთხი მამაკაცი უამრავი ადამიანის თვალწინ ჩამოახრჩვეს. თალიბებმა სახრჩობელად  ავტოამწე გამოიყენეს.

„თალიბანის“ წარმომადგენლებს მომხდარზე კომენტარი არ გაუკეთებიათ.

ცოტა ხნის წინ დაჯგუფების ერთ-ერთმა დამფუძნებელმა მოლა ნურდინ თურბაიმ სააგენტო Associated Press-თან ინტერვიუში განაცხადა, რომ ზოგიერთი დანაშაულისთვის სახალხოდ სიკვდილის დასჯის დაბრუნებას აპირებდნენ. მისი აზრით, მსგავს მეთოდს „შემაკავებელი ეფექტი“ გააჩნია.

 საჯაროდ დასჯა - კიდურების მოკვეთა ან ჩამოხრჩობა ავღანეთში ფართოდ იყო გავრცელებული 1996-2001 წლებში, როდესაც თალიბებმა ძალაუფლება ხელში პირველად ჩაიგდეს.