გრძელვადიანი მშვიდობისა და სტაბილურობის გარეშე არავითარი განვითარება არ იქნება, არც მომხდარა და არც მოხდება - ირაკლი ღარიბაშვილი

მინდა, ძალიან მოკლედ შევაფასო ჩვენს მიერ განვლილი ძალიან საინტერესო პერიოდი - ამ პერიოდის განმავლობაში ჩვენ ძალიან ბევრი პროექტი განვახორციელეთ მთელი ქვეყნის მასშტაბით - ამის შესახებ საქართველოს პრემიერ-მინისტრმა ირაკლი ღარიბაშვილმა „ქართული ოცნების“ ასპინძის მერობის კანდიდატის, როსტომ მაგრაქველიძის წარდგენისას განაცხადა.

მთავრობის მეთაურის თქმით, ძალიან ბევრი საქმე გაკეთდა ყველა მიმართულებით და პროგრესი და სიკეთე მართლაც ხელშესახებია, იქნება ეს ინფრასტრუქტურა, გზების მოწესრიგება, გაზიფიცირების სამუშაოები, წყალმომარაგების პროექტები, სოფლის მეურნეობის თუ ადგილობრივი წარმოების მიმართულებით უამრავი პროექტი დაფინანსდა.

„ძალიან კარგად გვესმის, რომ ქვეყანაში ძალიან ბევრი გამოწვევაა, ჩვენს ხალხს ჯერ კიდევ უჭირს და მთავარი გამოწვევაა უმუშევრობა, სიღარიბე, რომელიც ჩვენი მთავრი საზრუნავი უნდა იყოს. ჩვენ შევძელით ბოლო 7 არჩევნებში ღირსეული და დამაჯერებელი გამარჯვება და ახლა ვემზადებით ასევე ღირსეული და ძლიერი გამარჯვებისთვის 2 ოქტომბერს. ჩვენ ახლა ვგეგმავთ ძალიან მასშტაბური პროექტების დაწყებას. თითოეულ რეგიონზე არის მორგებული ყველა ის პროექტი, რომელიც ახლა მუშავდება. მაგალითად, სოფლის მეურნეობის მიმართულებით ვგეგმავთ 7 მილიარდი ლარის ინვესტირებას. ჩვენი გეგმის მიხედვით, არც ერთი გოჯი მიწა არ უნდა დარჩეს დაუმუშავებელი. ჩვენ თანმიმდევრულად უნდა ავითვისოთ ის რესურსი, რომელიც ჩვენს უნიკალურ ქვეყანას გააჩნია, იქნება ეს სოფლის მეურნეობა, მრავალწლოვანი კულტურების გაშენება, მეცხოველეობის განვითარება, უამრავი სხვა, რომელიც ამ რეგიონს გააძლიერებს, ფეხზე დააყენებს სოფელს და სოფლის მოსახლეობას. ადგილობრივი წარმოების მიმართულებით ჩვენ არაერთი ეფექტიანი ნაბიჯი გადავდგით ბოლო წლების განმავლობაში. დავიწყეთ ძალიან მნიშვნელოვანი პროგრამები - „აწარმოე საქართველოში“, რომლის ფარგლებში შეიქმნა სულ მცირე 20 ათასი ახალი სამუშაო ადგილი, დაფინანსდა ასეულობით ახალი საწარმო, გადაიარაღდა არსებული საწარმოები და ახლებიც აშენდა. მილიარდი ლარის ინვესტიცია განხორციელდა, მაგრამ გვესმის, რომ ეს საკმარისი არ არის. სწორედ ამ მიზნით, ჩვენ ვაპირებთ ამ პროგრამების გაფართოებას და 2,5 მილიარდი დოლარის ინვესტიცია ჩაიდება სახელმწიფოს და კერძო სექტორის ერთობლივი ძალისხმევით და 1300-მდე მეტი ახალი საწარმო დაფინანსდება. 350-ზე მეტი სფერო გამოვკვეთეთ, რომელიც უნდა დაფინანსდეს ჩვენი მთავრობის და ბიზნესის ერთობლივი ძალისხმევით. ეს მინიმუმ 100 ათას ახალ სამუშაო ადგილს შექმნის მომდევნო 3-4 წელიწადში. ძალიან ამბიციური გეგმები გვაქვს ინფრასტრუქტურის განვითარების მიმართულებით, ეს იქნება გზების, მაგისტრალური ინფრასტრუქტურის მშენებლობა, წყალგაყვანილობა, რომ ყველა ქალაქს 24-საათიანი წყალი ჰქონდეს. ასევე გამოწვევაა 3 ათასამდე სოფელს არ მიეწოდება სტანდარტის შესაბამისი, ხარისხიანი წყალი. გვაქვს დეტალური გეგმა, როგორ დავძლიოთ ეს გამოწვევა. ხელშესახები პროგრესი გვაქვს გზების მშენებლობის მიმართულებით. ყველა მუნიციპალიტეტში განახლებულია გზები, ხიდები და ეს პროცესი გაგრძელდება. ჯამში 8 წლის განმავლობაში 10 ათას კილომატრამდე გზას ჩაუტარდა აღდგენა, რეაბილიტაცია, მათ შორის ისეთ გზებს, რომლებიც თუნდაც საბჭოთა კავშირის დროს არ იყო აღდგენილი. ჩვენ გაათმაგებული ტემპებით უნდა ვიმუშაოთ, ვინაიდან ჩვენს მოსახლეობას ჯერ კიდევ უჭირს, სიღარიბე და უმუშევრობა არის მთავარი გამოწვევა“, - განაცხადა პრემიერმა.

მთავრობის მეთაურის თქმით, 175 ახალი სკოლა აშენდა ბოლო 8 წლის განმავლობაში, 250 სკოლის რეაბილიტაცია განხორციელდა და ასეულობით ახალი ბაღის აშენება და რეაბილიტაცია მოხერხდა ამ მოკლე პერიოდში.

„ახლა ვიწყებთ 800 სკოლის რეაბილიტაციას თანამედროვე ევროპული სტანდარტების მიხედვით, იმისთვის, რომ ჩვენმა შვილებმა ისწავლონ თანამედროვე, ევროპული ტიპის სკოლებში. ამ ყველაფერს სჭირდება შენარჩუნება და გაათმაგებული ტემპებით, უფრო მაგარი ენერგიით მუშაობა და ძალიან დიდი ძალისხმევა. ასევე ამ ყველაფერს სჭირდება გრძელვადიანი მშვიდობისა და სტაბილურობის შენარჩუნება. სტაბილურობის გარეშე არავითარი განვითარება არ იქნება, არც მომხდარა და არც მოხდება“, - აღნიშნა პრემიერმა.