სააკაშვილის ჩამოსვლაზე განცხადებები „ოცნების“ წისქვილზე ასხამს წყალს - მამუკა ხაზარაძე

პარტია „ლელოს“ ლიდერის მამუკა ხაზარაძის თქმით, წინასაარჩევნოდ სააკაშვილის ჩამოსვლასთან დაკავშირებით განცხადებები „ქართული ოცნების“ წისქვილზე ასხამს წყალს. მან მიხეილ სააკაშვილის დასაბრუნებლად თაკო ჩარკვიანის მიერ "საერთო სახალხო მოძრაობას" დაფუძნების შესახებ საუბრისას განაცხადა.

„არ ვიცი, ეს განცხადება რას ემსახურება. ყველას აქვს უფლება, დააფუძნოს ნებისმიერი ორგანიზაცია. ჩემთვის ეს თემას არ წარმოადგენს. თუ ვინმეს ჩამოსვლა უნდა ქვეყანაში, მათ შორის პრეზიდენტს, მას შეეძლო ჩამოსულიყო ან ჩამოვიდეს. უბრალოდ, წინასაარჩევნოდ მის ჩამოსვლაზე განცხადებები „ოცნების“ წისქვილზე ასხამს წყალს, ესაა ფაქტი. ჩვენ, მთელმა ოპოზიციამ არ უნდა გავუშვათ დღეს შანსი, დავამარცხოთ „ქართული ოცნება“ და მივიღოთ რიგგარეშე არჩევნები. ესაა ახლა მთავარი და დანარჩენი პრიორიტეტს არ წარმოადგენს“, – განაცხადა მამუკა ხაზარაძემ.

პარტია „კანონი და სამართლის“ ლიდერმა, თაკო ჩარკვიანმა დღეს განაცხადა, რომ მიხეილ სააკაშვილის დასაბრუნებლად ორგანიზაციას აფუძნებს.