ვსვამდი ალკოჰოლს, რათა დამეცხრო დედის გარდაცვალებით გამოწვეული ტკივილი - პრინცი ჰარი

პრინცი ჰარი ამბობს, რომ ძალიან ბევრ ალკოჰოლს იღებდა 28-32 წლის ასაკში, რათა დაეცხრო ტკივილი, რომელიც დედის გარდაცვალების შემდეგ სულ თან სდევდა. „ერთ დღეში, ერთი კვირის დოზა ალკოჰოლს ვსვამდი“, - ამბობს ჰარი. მან ასევე აღიარა, რომ მზად იყო მიეღო ნარკოტიკებიც, რათა აღარ განეცადა ის ტკივილი, რომელიც პრინცესა დაიანას გარდაცვალებიდან ათ წელზე მეტი ხნის შემდეგაც სტანჯავდა.

უელსის პრინცესა დაიანა 1997 წლის აგვისტოში, პარიზში, ავტოკატასტროფაში დაიღუპა.

ფსიქოლოგიური პრობლემების, მუდმივი შფოთვისა და პანიკური შეტევების შესახებ ჰარიმ ამერიკელი ტელეწამყვანის ოპრა უინფრის გადაცემაში ისაუბრა. 

„ჩემ თავს არ ვეკუთვნოდი. ყოველ ჯერზე, როდესაც პიჯაკს ვიცვამდი და ჰალსტუხს ვიკრავდი, თავს ვაიძულებდი, მეთამაშა. სახლიდან გასვლისთანავე ოფლში ვცურავდი. მუდმივად ვცხოვრობდი რეჟიმში „დაარტყი და გაიქეცი“, - ყვება ჰარი. „პარასკევს ან შაბათს იმდენს ვსვამდი, რამდენსაც ადამიანები ერთ კვირაში სვამენ, არა იმიტომ, რომ ეს მომწონდა, არამედ იმისთვის, რომ ტკივილი შემენიღბა“, - ამბობს ჰარი.

1997 წელს მთელი მსოფლიო უყურებდა 12 წლის ჰარის, რომელიც ძმასთან, მამასთან, ბიძასთან და პაპასთან ერთად დედის კუბოს მიყვებოდა.

„იმ დღიდან, დამამახსოვრდა მხოლოდ ქვაფენილზე მიმავალი ცხენების ჩლიქების ხმა. ისეთი შეგრძნება მქონდა, რომ თითქოს ჩემი სხეული დავტოვე და უბრალოდ მოჩვენებასავით გვერდით მივყვებოდი. მხოლოდ ემოციის მეათედს გამოვხატავდი. მაგრამ სხვებისგან განსხვავებით, ჩემთვის ის იყო დედა - სხვები მას არც კი შეხვედრიან“, - ამბობს ჰარი.