საქართველოს საფეხბურთო ნაკრების ახალ მთავარ მწვრთნელად ვილი სანიოლი დაინიშნა

საქართველოს ეროვნული საფეხბურთო ნაკრების ახალ მთავარ მწვრთნელად საფრანგეთის ნაკრებისა და მიუნხენის ბაიერნის ყოფილი ფეხბურთელი ვილი სანიოლი დაინიშნა.

საქართველოს ფეხბურთის ფედერაციაში დღეს ონლაინ-რეჟიმში აღმასკომის სხდომა გაიმართა, რომელზეც 43 წლის სანიოლი ნაკრების მთავარი მწვრთნელის პოსტზე დაამტკიცეს. ფრანგის დებიუტი საქართველოს ეროვნულ ნაკრებში 2021 წლის 25 მარტს შედგება. 2022 წლის მსოფლიო ჩემპიონატის საკვალიფიკაციო ეტაპის პირველ ტურში საქართველოს ნაკრები სტუმრად შვედეთს დაუპირისპირდება. სანიოლისთან კონტრაქტი 2-წლიანია.

ვილი სანიოლი საფრანგეთის ნაკრებთან ერთად მსოფლიოს ვიცე ჩემპიონი (2006) და კონფედერაციის თასის ორგზის გამარჯვებული გახდა (2001, 2003). სანიოლიმ მიუნხენის ბაიერნის შემადგენლობაში უეფას ჩემპიონთა ლიგა (2001) და გერმანიის ჩემპიონის ტიტული ხუთჯერ (2001, 2003, 2005, 2006, 2008) მოიგო. ფრანგი სპეციალისტი 2011-2013 წლებში საფრანგეთის ნაკრების ტექნიკური დირექტორის პოსტს იკავებდა, ხოლო 2013-2014 წლებში საფრანგეთის 21-წლამდე ნაკრების მთავარი მწვრთნელი იყო. ვილი სანიოლიმ მწვრთნელის რანგში საკლუბო კარიერა დაიწყო და 2014-16 წლებში ფრანგულ ბორდოს ხელმძღვანელობდა. 2017 წლიდან სანიოლი ბაიერნის სამწვრთნელო შტაბში მუშაობდა.

ნაკრების ყოფილმა მწვრთნელმა, ვლადიმირ ვაისმა მწვრთნელობა გასული წლის ნოემბერში დატოვა.