სოტბის აუქციონზე ქართული ხელოვნება რუსული არტის სახელით იყიდება - თემო გოცაძე

საქართველო, თბილისი - 19:02 | 19.01.2021
ნანახია: 321

საქართველოს სახალხო მხატვარი თემო გოცაძე სოციალურ ქსელში სოტბის აუქციონზე ქართული მხატვრობის რუსული არტის სახელით გაყიდვის მორიგ ფაქტს ეხმიანება. მისი განმარტებით, ფიროსმანიდან დაწყებული დღემდე ქართული ხელოვნება იყიდება, როგორც რუსული არტი.

„სოტბის აუქციონის ვებგვერდზე დაიდო ინფორმაცია, რომ დეკემბერში გაიყიდა მერაბ აბრამიშვილის ორი ნამუშევარი. ძალიან სასიხარულოა ის ფაქტი, რომ ქართველი მხატვრები თანდათან იპყრობენ საერთაშორისო სააუქციონო სივრცეებს, მაგრამ გრძელდება ტენდენცია იმისა, რომ დაწყებული ფიროსმანიდან დღემდე ქართული ხელოვნება იყიდება რუსული არტის სახელით. ეს პრობლემა გრძელდება უკვე 30 წელია და სამწუხაროდ, სამინისტრო უმოქმედოა. მიმაჩნია, რომ 2 ორგანიზაცია, საგარეო საქმეთა სამინისტრო და კულტურის სამინისტრო ვალდებულია ჰქონდეს რეაქცია რუსეთის მსგავს ექსპანსიაზე. ეს არის კულტურის საერთაშორისო პოლიტიკა, სადაც რეალურად დღეს ვცხადდებით რუსულ ხელოვნებად!", -წერს თემო გოცაძე.

მსგავსი ფაქტი ბოლო წლებში არაერთხელ დაფიქსირდა. 2015 წელს "ფიროსმანის ნამუშევრის ქრისტის აუქციონზე რუსული კოლექციით გატანის ფაქტმა საზოგადოების მკვეთრი რეაქცია გამოიწვია. თემო გოცაძე იყო ერთ-ერთი ხელოვანი, ვინც კატეგორიულად მოითხოვდა საკითხის მოგვარებას. კულტურის სამინისტრომ პირობა დადო, რომ აუქციონებზე ქართველი ავტორების საკითხს მოაგვარებდა, თუმცა პრობლემა დღემდე მოუგვარებელია და კულტურის ყველაზე პრესტიჟულ საერთაშორისო პლატფორმებზე ქართველი მხატვრების შემოქმედება რუსულ ხელოვნებად გადის.




არქივი

მოგვძებნე Facebook-ზე