მიუნხენის აუქციონზე ჰიტლერის სიტყვით გამოსვლის მანუსკრიპტი გაიყიდა

საქართველო, თბილისი - 19:37 | 23.10.2020
ნანახია: 1929

მიუნხენის აუქციონზე ადოლფ ჰიტლერის სიტყვით გამოსვლის მანუსკრიპტი ებრაული თემის პროტესტის ფონზე გაიყიდა. აღნიშნული ლოტი უკვე მოხსნილია გაყიდვიდან აუქციონის სახლის Hermann Historika-ს ვებგვერდზე.

1935 წლის ექვსგვერდიანი მანუსკრიპტის გარდა, რომელიც აუქციონის ვებგვერდზე 6 ათას ევროდ იყო შეფასებული, გასაყიდად ასევე გამოტანილი იყო ფიურერის ვერცხლის დანა-ჩანგალი, მისი ყავის მადუღარა, ინიციალებითა და სვასტიკით, ღია ბარათები და ხელსახოცები. აუქციონის სახლის წარმომადგენლებს ვაჭრობის შედეგებზე ჯერ კომენტარი არ გაუკეთებიათ.

მანამდე ევროპის ებრაელთა ასოციაციის ხელმძღვანელმა მენახემ მარგოლინიმ ნაცისტების ბელადის ნივთების გაყიდვას მიუნხენის აუქციონზე უპასუხისმგებლო აქცია უწოდა, რომელიც ჰიტლერის ენთუზიასტების დაკანონებას ეხმარება.

გერმანიაში ხშირად ტარდება ჰიტლერის ნივთების აუქციონი. 2019 წლის ნოემბერში Hermann Historika-მ გასაყიდად გამოიტანა ნაცისტების ბელადის ქუდი, რომელიც 50 ათას ევროდ გაიყიდა. გასულ წელს ჰიტლერის რამდენიმე ნახატი ბერლინისა და ნიურბერგის აუქციონებზე გამოიფინა. ცნობილია, რომ 2014 წელს დიქტატორის ერთ-ერთი ნახატი ნიურბერგის აუქციონზე 100 ათას ევროდ ჩინელმა მყიდველმა შეიძინა.


პოლიტიკა



არქივი

მოგვძებნე Facebook-ზე