მხარეები ასევე შეთანხმდნენ, რომ კონგრესი ნატოში ინტეგრაციასა და აშშ-საქართველოს ორმხრივი თანამშრომლობის კუთხით საქართველოს მხარს კვლავ დაუჭერს.

შოთა ღვინერიამ აშშ-ის კონგრესის წარმომადგენლებს რეგიონში არსებული უსაფრთხოების გარემოსა და რუსეთის პოლიტიკის შესახებაც მიაწოდა ინფორმაცია. ამერიკულმა მხარემ გლობალური უსაფრთხოების უზრუნველყოფაში შეტანილი წვლილისთვის საქართველოს მადლობა კიდევ ერთხელ გადაუხადა.

შეხვედრის დასასრულს მინისტრის მრჩეველმა აშშ-ის კონგრესის წარმომადგენლების სტუმრობის მნიშვნელობაზე ისაუბრა: „ვფიქრობ, ეს იყო ძალიან კარგი საშუალება, კიდევ ერთხელ დავრწმუნებულიყავით, რომ ჩვენი სტრატეგიული პარტნიორები ძალიან დიდ ყურადღებას უთმობენ ჩვენთვის მნიშვნელოვან საკითხებს. ეს ვიზიტი, სწორედ, ამის დადასტურებაა. საგარეო საქმეთა კომიტეტის წარმომადგენლები დაგვპირდნენ, რომ ხელმძღვანელობასთან ჩაიტანენ იმ გზავნილებს, რომლებიც თბილისში მიიღეს და მაქსიმალურად შეუწყობენ ხელს, რათა საქართველოსთვის მნიშვნელოვანი საკითხების გადაწყვეტისას კონგრესი კიდევ უფრო აქტიური მხარდამჭერი იყოს.“