თუ ლუკაშენკა მშვიდობიანად წავა, უსაფრთხოების გარანტიებს მიიღებს - სვიატლანა ციხანოუსკაია

ბელარუსის ოპოზიციის ლიდერი სვიატლანა ციხანოუსკაია ამბობს, რომ  თუ მოქმედი პრეზიდენტი ალიაქსანდრ ლუკაშენკა ხელისუფლებიდან მშვიდობიანად წავა, უსაფრთხოების გარანტიებს მიიღებს.

 „რა თქმა უნდა, თუ მშვიდობიანად წავა, ადამიანურად, მაშინ ეს სავარაუდოა. შესაძლოა, ამის თქმა დადასტურებულადაც. პირადად, მე ყველა ადამიანის მოსაზრებას გავითვალისწინებ ამ საკითხში“, - განაცხადა ციხანოუსკაიამ გამოცემა LB.ua-სთან ინტერვიუში.

თვეზე მეტია ბელარუსში გრძელდება მასობრივი პროტესტი საპრეზიდენტო არჩევნების შედეგების წინააღმდეგ, რომელშიც გამარჯვებული გამოცხადდა ამჟამინდელი სახელმწიფოს მეთაური ალიაქსანდრ ლუკაშენკა, რომელიც ამ თანამდებობას 1994 წლიდან იკავებს.

არჩევნები 9 აგვისტოს გაიმართა. ცესკოს მიერ დამტკიცებული შედეგების თანახმად, ამომრჩეველთა 80.1% -მა ხმა მისცა ლუკაშენკას, 10.12% - მის მთავარ მოწინააღმდეგეს სვიატლანა ციხანოუსკაიას.

გუშინ ევროკავშირის უმაღლესმა წარმომადგენელმა უსაფრთხოების პოლიტიკასა და საგარეო საკითხებში, ჟოზეპ ბორელმა განაცხადა, რომ ევროკავშირი ლუკაშენკას ლეგიტიმურ პრეზიდენტად არ აღიარებს.