ვაპირებ, აქციების გაგრძელებას სექტემბრის შუა რიცხვებიდან - ბაჩალიაშვილის დედა

თამარ ბაჩალიაშვილის ოჯახმა გენერალურ პროკურატურასთან აქცია გამართა. ბაჩალიაშვილის დედა, თეონა თამაზაშვილი სატელიტიდან გადაღებული სურათების საქმეში ჩართვას ითხოვს, რომელიც აჩვენებს, რა დროის განმავლობაში იდგა გარდაცვლილის მანქანა იქ, სადაც იპოვეს. ოჯახის კიდევ ერთი მოთხოვნა საქმეზე არსებული მუხლის შეცვლა და მკვლელობის მუხლად გადაკვალიფიცირებაა.

„აქციის მიზანია, რომ პირველ რიგში დადონ სატელიტური სურათები, სადაც გამოჩნდება იდგა თუ არა მანქანა იქ, სადაც ნაპოვნი იყო. ასევე, საქმის გადაკვალიფიცირება მკვლელობის მუხლით, უნდა დასახელდნენ მკვლელები, სავარაუდოდ სამ მაღალჩინოსანზეა საუბარი. ფაქტია, ალყაში ჰყავდათ ჩემი შვილის მანქანა და ისე მიჰყავდათ. ვადებს რაც შეეხება, თვითონ თქვეს თვის ბოლომდეო. მე არ ჩავრთე დღეს ამ აქციაში ბევრი ხალხი, რომ პოლიტიკური ელფერი არ მისცემოდა. ეს არის გამაფრთხილებელი აქცია. ჩემი შვილის საფლავზე დავიფიცე, რომ არ მოვასვენებ. აუცილებლად ვაპირებ, აქციების გაგრძელებას სექტემბრის შუა რიცხვებიდან“, – ამბობს თეონა თამაზაშვილი.

ბაჩალიაშვილის დედამ თურქეთის და აზერბაიჯანის მთავრობებსაც მიმართა თხოვნით, დაინტერესდნენ და საქართველოს მთავრობას მოთხოვონ იმ სამი მაღალჩინოსნის ფაილები, რომელიც თეონა თამაზაშვილის თქმით, ჩართულნი იყვნენ ყარაბაღის იარაღით მომარაგებაში. გარდაცვლილის დედის თქმით, თამარმა სწორედ ეს სქემა გაშიფრა და ამ გადარიცხვებში იყო ჩართული.