რესპუბლიკური საავადმყოფოს 4 თანამშრომელს კორონავირუსი დაუდასტურდა

რესპუბლიკური საავადმყოფოს 4 თანამშრომელს COVID-19 დაუდასტურდა. ამის შესახებ კლინიკის დირექტორმა ლევან გოფოძემ განაცხადა.
„სამედიცინო პერსონალიდან ოთხს დაუდასტურდა კოვიდინფექცია, გუშინ იყო პირველი შემთხვევა და დღეს ამას დაემატა სამი. მუდმივად ვაფრთხილებდით ყველას, მათ შორის მოსახლეობასაც – კოვიდინფექცია არსად წასულა, ის ჩვენ გვერდით ცხოვრობს და არ უნდა მოვეშვათ, არ დავარღვიოთ წესები. სამწუხაროდ, ჩვენთან ასეთი შემთხვევა მოხდა, ჯერ მედპერსონალის ერთ წარმომადგენელს დაუდასტურდა და დღეს კიდევ სამი დაემატა.

რა თქმა უნდა, ჩვენ გეგმურად ვუტარებდით „პისიარ“-ტესტირებას მთელ მედპერსონალს. ახალი დამთავრებული გვქონდა, სრულად გატესტილი გვყავდა ყველა და ყველა ნეგატიური იყო. ახლა თავიდან დავიწყებთ და გავტესტავთ ყველა მედპერსონალს, რომ ავიცილოთ გავრცელება“,- განაცხადა გოფოძემ.

გოფოძის თქმით, ინფიცირების წყაროს შესახებ ინფორმაცია არ აქვთ და ამ მიმართულებით დაავადებათა კონტროლის ცენტრი მუშაობს.
ამ დროისათვის რესპუბლიკურ საავადმყოფოში სულ 34 პაციენტი იმყოფება, მათგან 10 პაციენტს კორონავირუსი აქვს დადასტურებული.