სასტუმროები მუშაობის განახლებას დღეიდან შეძლებენ

საქართველოში სასტუმროები მუშაობის განახლებას დღეიდან შეძლებენ.

განახლდება ის სასტუმროები, რომლებსაც შესაბამისი ნებართვა აქვთ.

ნებართვის მისაღებად საჭიროა, სასტუმრომ ჯანდაცვის სამინისტროს შესაბამისი უწყებების შემოწმება გაიაროს და მოთხოვნები დააკმაყოფილოს.

სასტუმროების, რესტორნებისა და კაფეების ფედერაციის განმარტებით, მაღალი კლასის სასტუმროები და საოჯახო ტიპის სასტუმრო სახლები აკეთებენ განაცხადს ჯანდაცვის სამინისტროს ვებგვერდზე, შემოწმების შემდეგ მიღებული ნებართვის საფუძველზე კი ეძლევათ საქმიანობის უფლება. მათივე ინფორმაციით, ამ ეტაპზე იკრძალება ჰოსტელების მუშაობა, გამონაკლის გარდა, რაც ინდივიდუალური ოთახის შეთავაზებას გულისხმობს. განაცხადის შევსება არ ესაჭიროებათ ბინების გამქირავებლებს.

რეგულაციების დარღვევის შემთხვევაში აღნიშნული ობიექტები დაჯარიმდებიან.